Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 217 Hüküm no: 332 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin'in, kendisine miras kalan ev ve bahçedeki hissesini Ahmed'e sattığı Medîne-i Üsküdar muzâfâtından Adalar nâhiyesine tâbi‘ Soğanlık karyesi sâkinelerinden iken bundan akdem vefât eden Âişe bt. Mustafa’nın verâseti sulbî sagīr oğlu Mustafa’ya ve zevc-i metrûku el-Hâc Hüseyin’e münhasıra ve tashîh-i meselesi dört sehmden olup üç sehmi mezbûr Mustafa’ya bir sehmi mezbûr el-Hâc Hüseyin’e isâbet eyledikden sonra mezbûr el-Hâc Hüseyin tarafından husûs-ı âti’l-beyânda vekîli olduğu Mehmed b. Salih, Veli b. Mustafa şehâdetleriyle sâbit ve sübût-ı vekâlete hükm-i şer‘î lâhık olan İbrahim Bey b. Ali meclis-i şer‘-i şerîfde işbu bâ‘isü’l-kitâb Ahmed b. Mustafa mahzarında vekâleten bi’t-tav‘i’s-sâf ikrâr ve i‘tirâf edip müteveffâ-yı mezbûrenin karye-i mezbûrede vâki‘ bir tarafı Hoca oğlu Mehmed Beşe bağçesi bir tarafı dere bir tarafı Na‘lband Hüseyin Beşe bağçesi iki tarafı tarîk-i âm ile mahdûd ve mümtâz müşteri-i mezbûr ile müşterek olan mülk menzilinden ve bağçesinden müvekkilim mezbûr el-Hâc Hüseyin’e isâbet eden bir sehm hissesi cemî‘ tevâbi‘ ve levâhıkı ile tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i kat‘î ile fiddî râyicü’l-vakt bin iki yüz akçeye vekâletim hasebiyle mezbûr Ahmed b. Mustafa’ya bey‘ ve teslîm etdi, ol dahi minvâl-i muharrer üzere iştirâ ve tesellüm ve kabz ve kabûl eyledikden sonra semeni olan meblağ-ı mezbûr bin iki yüz akçeyi bi’l-vekâle mezbûrun yedinden tamâmen ahz u kabz etdi, fîmâ-ba‘d menzil-i mahdûd-ı mezbûr ve bağçe-i mahdûd-ı mezbûrda müvekkilim mezbûr el-Hâc Hüseyin’in alâka ve medhali kalmayıp mezbûr Ahmed’in mülk-i müşterâsı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-evâili Zilka‘de sene [1]123 Şuhûdü’l-hâl: Bâlâda mezkûr olan şâhidlerdir.