Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 218 Hüküm no: 334 Orijinal metin no: [58b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun'un bağını Tarandafil'e sattığı Mahmiye-i İstanbul’da Gurebâ Hüseyin Ağa mahallesinde sâkine Âişe Hatun bt. Abdullah b. Abdurrahman tarafından husûs-ı âti’l-beyâna vekîl olup zât-ı mezbûreyi ma‘rifet-i şer‘iye ile ârifân Mustafa b. Hasan ve diğer Mustafa b. Mehmed nâm kimesneler şehâdetleriyle şer‘an vekâleti sâbite olan es-Seyyid İsmail Çelebi b. es-Seyyid Ahmed nâm kimesne meclis-i şer‘-i şerîf-i enverde işbu bâ‘isü’l-vesîka Tarandafil v. Panayot mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Âişe Hatun’un silk-i mülkünde münselik olup medîne-i Üsküdar’a muzâfe Adalar nâhiyesine tâbi‘ Kartal nâm karyede vâki‘ bir tarafdan mezbûr Tarandafil mülkü ve bir tarafdan Hacı Abdünnebi mülkü ve bir tarafdan Hacı Mahmud nâm kimesne mülkü ve bir tarafdan Kara Halil nâm kimesne mülkü ile mahdûd tahmînen sekiz dönüm kürûmu mülk bağını bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz guruşa mezbûr Tarandafil’e bey‘ ve teslîm, ol dahi ber-vech-i muharrer iştirâ ve kabûl ve tesellüm ve kabz eylediğinden sonra semen olan meblağ-ı mezbûr iki yüz guruşu müvekkilem mezbûre Âişe mezbûr Tarandafil yedinden tamâmen ahz u kabz eyledi, fîmâ-ba‘d zikr olunan bağ-ı mezbûr Tarandafil’in mülk-i müşterâsı olup müvekkile-i mezbûrenin kat‘â alâka ve medhali kalmadı, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene erba‘a aşere ve mi'e ve elf. Şuhûdü’l-hâl: Ahmed Ağa b. İbrahim, Mustafa b. Mirza, Süleyman b. Ahmed, Ebubekir b. Abdullah, Ahmed b. Mehmed, Hacı Süleyman b. Piri, Mustafa b. Mehmed serdâr, Mustafa b. Mehmed, Hüseyin Çelebi, Hasan Çelebi b. Mehmed, el-Hâc Mehmed b. İdris.