Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 219 Hüküm no: 335 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maraş'tan yola çıkan hazinenin İstanbul'a emniyetli şekilde ulaştırılması Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâib müşeyyidü erkâni’l-ma‘den ve’l-iclâl el-mahfûfu bi-sunûfi avâtıfi’l-meliki’l-a‘lâ Maraş’dan Âsitâne-i sa‘âdetime varınca yol üzerinde vâki‘ eyâlet muhâfazası olan vüzerâ-yı i‘zâmım -edâmallâhu te‘âlâ iclâlehüm- ve mefâhirü’l-ümerâi’l-kirâm ve merâci‘ü’l-küberâi’l-fihâm zevi’l-kadri ve’l-ihtirâm sâhibü’l-izzi ve’l-ihtişâm el-muhtassu bi-mezîdi inâyeti’l-meliki’l-a‘lâ eyâlet beylerbeyleri ve ber-vech-i arpalık sancak mutasarrıfları -dâme ikbâlühüm- ve mefâhirü’l-kuzât ve’l-hükkâm ma‘âdinü’l-fazl ve’l-kelâm mahâll-i mezbûrdan Âsitâne-i sa‘âdete varınca yol üzerinde vâki‘ olan kādılar -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve mütesellim[le]ri ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki hâlâ Maraş cânibinden Âsitâne-i sa‘âdetime gelen hazîne yol üzerinde her kangınızın taht-ı kazâsına vâsıl olur ise yanına yarar ve mu‘temedün-aleyh müsellem adamlar ta‘yîn ve menâzil ve merâhilde me'men ve mahfûz yerlerde konaklar tedârik edip ve gecelerde beklendirip gereği gibi muhkem hıfz u hırâset ederek emîn ve sâlim birbirinize ulaşdırıp avk u tehîrden ve zarâr u gezend erişdirilmekden ihtirâz ve husûs-ı mezbûru sâire kıyâs eylemeyip şöyle ki bir dürlü müsâmaha ve tekâsül eylemeye, yanına kifâyet mikdârı müsellah ve müretteb adam koşulmamağla iyâzen billâhi te‘âlâ bir dürlü zarâr erişmek ihtimâli olur ise sonra bir vechile özür ve cevâbınız mesmû‘-ı hümâyûnum olmayıp tertîb-i cezâ olunmaları mukarrer ve muhakkak bilip ona göre bu bâbda her biriniz gāyet basîret ve iştibâh üzere hareket edip bir dürlü müsâmaha ve tekâsülden be-gāyet ictinâb eyleyesin deyü fermân-ı âlîşânım sâdır olmuşdur, buyurdum ki hükm-i şerîfim (°) vardıkda bu bâbda sâdır olan emrim üzere amel edip dahi zikr olunan hazîne her kangınızın taht-ı hükûmetine dâhil olur ise yanına yarar ve mu‘temedün-aleyh müsellah adamlar koşup ve menâzil ve merâhilde me'men ve mahfûz yerlere kondurup ve gecelerde beklendirip gere[ği] gibi muhkem hıfz u hırâset ederek emîn ve sâlim birbirinize erişdirip avk u tehîrden ve ihmâl ve müsâheleden ihtirâz edip ve husûs-ı mezbûru sâire kıyâs etmeyip şöyle ki bir dürlü müsâmaha ve tekâsül eylemeye, yanına kifâyet mikdârı müsellah ve müretteb adam koşulmamağla iyâzen billâhi te‘âlâ bir dürlü ifk ü iftirâ isâbet eylemek ihtimâli olur ise sonradan kat‘iyyen bir vechile özür ve cevâbınız mesmû‘-ı hümâyûnum olmayıp tertîb-i cezâ olunmaları mukarrer ve muhakkak bilip ona göre bu bâbda her birininiz gāyet basîret ve iştibâh üzere hareket edip bir dürlü müsâmaha ve tekâsülden be-gāyet ictinâb eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâmin min-şehri Şevvâli’l-mükerrem sene selâse ve ışrîn ve mi'e ve elf. Kostantıniyye el-mahrûse. Kad vasale ileynâ fî 29 Zilhicce sene [1]123