Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 227 Hüküm no: 340 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehzade Sultan Mehmed Han Evkafı'na ait Maltepe'deki bostan ve tarlaların müzayede ile satılması Kıdvetü’n-nüvvâb ve’l-müteşerri‘în Maltepe kazâsında nâibü’ş-şer‘ olan efendi kâm-yâb, Dürer-i da‘avât-ı lâyıka ithâfıyla inhâ olunur ki, taht-ı nezâretimizde olup İstanbul’da vâki‘ merhûm Şehzâde Sultan Mehmed Han Evkāfı’ndan Üsküdar kazâsına tâbi‘ Maltepe mukāta‘ası toprağında bir kaç kıt‘a bostan ve tarlalara mutasarrıf olan Kartallı Ahmed Ağa’nın oğulları bundan akdem fevt olduklarında mutasarrıf oldukları gerek müşterek ve gerek müstakıl bostan ve tarla bi’l-cümle vakfa âid olup taraf-ı vakfdan mu‘accele ile tâlibine fürûht olunup on bin akçesi kānûn üzere mukāta‘a-i mezbûre zâbitinin ve kusûru vakıf için ahzolunmak kānûn-ı kadîm olmağla evkāf-ı selâtîn-i i‘zâm mukāta‘âtları vâki‘ olan mahlûlât mu‘accelesinden on bin akçeden ziyâde vakfa îrâd-ı masârıf ve vakfa sarf olunmak üzere bundan akdem emr-i âlî sâdır olmuş iken mukāta‘a-i mezbûrede zikr olunan mahlûlât henüz taraf-ı vakfdan müzâyede olunup tâlibine fürûht olunmak üzere iken mukāta‘a-i mezbûre zâbiti tama‘-ı hâmı sebebiyle hilâf-ı emr-i âlî ve kadîme mugāyir başka başka temessük ile âhara fürûht edip vakf-ı şerîfe gadr etmekle mektûb tahrîr ve irsâl olunmuşdur. Vusûlünde gerekdir ki usûl-i mezbûr ve sâir bu misillü mevâd için mukāta‘a-i mezbûre zâbiti verdiği temessüğüne min-ba‘d amel olunup müteveffânın mutasarrıf olduğu besâtîn ve tarla cümlesi birden sûk-ı sultânîde müzâyede olunup mu‘accelesi her kimin üzerinde karâr-dâde olunur ise on bin akçesi mukāta‘a-i mezbûre zâbitine edâ ve kusûru taraf-ı vakıfdan zabt olunmak üzere ziyâde takayyüd ve ihtimâm eylemeniz me'mûldür, bâkī ilm ü fazîlet dâim bâd. Kad vasale ileynâ fî 4 Rebî‘ülâhir sene [1]124 (İmza)