Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 227 Hüküm no: 341 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitraki'nin ev ve dükkânlarını Nikola Reis ile Makaryos'a sattığı Medîne-i Üsküdar muzâfâtından Adalar nâhiyesine tâbi‘ Ada-i kebîr nâm karye sâkinlerinden Dimitraki v. Zakar nâm zimmî meclis-i şer‘-i şerîf-i hatîrde işbu bâ‘isânü’s-sifr Nikola Reis v. Kostantin ve Makaryos v. Manol nâmân zimmîlerin mahzarlarından bi’t-tav‘i’s-sâfî ikrâr-ı tâm ve takrîr-i kelâm edip zikri âtî akdin sudûruna değin silk-i mülkümde münselik olup karye-i mezbûrda vâki‘ bir taraflarından Vebaldi mülkü ve bir taraflarından Vandi mülkü ve tarafeynleri tarîk-i hâs ile mahdûd iki bâb menzilimi ve menzil-i vâhidin fevk üç oda ve taht mahzen ve ardı bağçe içinde su kuyusu ve kenîfi ve önünde hayatı denize varıncaya dek ve havlu müştemil ve menzil-i mezbûrun muttasılında diğer menzilin fevk iki oda ve taht mahzen ardında bağçe ve su kuyusu ve havlu müştemil ve yine mülkümden bir bâb dükkân fevk iki oda ve tahtları mahzen ve yine mülkümden dükkân-ı mezbûra muttasıl bir mahzen ve bir iskele bir taraf Kenaloğlu’nun mülkü ve bir taraf Makrooğlu’nun mülkü ve bir taraf deniz ve taraf-ı râbi‘ tarîk-i âm ile mahdûd olan menâzillerimi ve dekâkînleri cemî‘ tevâbi‘ ve levâhıkı ile bin iki yüz altmış üç kıt‘a esedî guruşa mesfûrân Nikola v. Kostantin ve Makaryos v. Manol nâmân zimmîlere îcâb [ve] kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile bey‘ ve teslîm eyleyip onlar dahi vech-i muharrer üzere iştirâ ve tesellüm ve temellük ve kabûl ve kabz eyledikden sonra semeni olan meblağ-ı mezbûr bin iki yüz altmış üç kıt‘a esedî guruşu mesfûrân Nikola Reis v. Kostantin ve Makaryos v. Manol nâmân zimmîler yedlerinden bi’t-tamâm ahz u kabz eyledim, fîmâ-ba‘d menzilân-ı mahdûdân ve dekâkîn-i mahdûdîn ve mahzen ve iskele bi-isrihim mesfûrân Nikola Reis v. Kostantin ve Makaryos v. Manol nâmân zimmîlerindir, benim aslâ alâka ve medhalim kalmayıp mesfûrânın mülk-i müşterâlarıdır, keyfe mâ yeşâ ve yahtâr mutasarrıf olsunlar dedikde, gıbbe’t-tasdîki’ş-şer‘î mâ-vaka‘a bi’t-taleb ketb ü tahrîr olundu. Hurrire fi’l-yevmi’s-sâlis min-Cemâziyelûlâ li-sene erba‘a ve aşer ve mi'e ve elf. Şuhûdü’l-hâl: Mehmed b. Abdullah, Mustafa b. Ömer, Mehmed b. Musa, Mehmed b. Abdullah, İbrahim Beşe b. Mehmed Beşe.