Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 228 Hüküm no: 342 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani ile Hanife'nin sahip oldukları bağa haksız yere el koyan Nasıf ile sulh bedeli karşılığı anlaşma sağlandığı Medîne-i Üsküdar muzâfâtından Adalar nâhiyesine tâbi‘ Soğanlık nâm karye sâkinlerinden Ümmühani bt. Mehmed ve Hanife bt. Mehmed nâmân hatunlar tarafından sulh-ı âti’z-zikre vekîl olup zât-ı mezbûreleri ma‘rifet-i şer‘iye ile ârifân İbrahim Ağa b. Ali ve Halil b. (°) nâmân kimesnelerin şehâdetleri ile sâbitü’l-vekâle olan Mehmed Beşe b. Abdullah nâm kimesne yine karye-i mezbûre sâkinlerinden Nasıf b. Mehmed mahzarında bi’l-vekâle ikrâr, müvekkilelerim mezbûrelerin vâlideleri olup bundan akdem fevt olan Emine bt. Abdullah nâm müteveffiyeden müvekkilelerime intikāl eden karye-i mezbûre toprağında vâki‘ ma‘lûmetü’l-hudûd üç kıt‘a bağ ve sâir tecemmülât-ı hânesin mezbûr Nasıf fuzûlen zabt ve tasarruf edip hâlâ mezbûrdan taleb ve da‘vâ sadedinde iken beynimize Müslimîn tavassut edip on bir guruş üzerine inşâ-i akd-i sulh eylediklerinde ben dahi bi’l-vekâle sulh-ı mezbûra râzı ve bedel-i sulh meblağ-ı mezbûr on bir kıt‘a esedî guruşu bi’t-tamâm ahz u kabz eyleyip ba‘de’l-ahz meblağ-ı mezbûru müvekkilelerime teslîm edip mezbûr Nasıf’ın zimmetini ibrâ-i âm ile ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Hurrire fi’l-yevmi’s-sâbi‘ min-Cemâziyelûlâ li-sene erba‘a ve ışrîn ve mi'e ve elf. Temmet. Şuhûdü’l-hâl: Mehmed b. Mehmed, İsmail Ağa b. Ali, Mehmed Ağa b. Mustafa, Mustafa Haseki, İbrahim Ağa Haseki el-Mübâşir, Hüseyin b. Mustafa, Mehmed b. Abdullah Çukadâr.