Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 229 Hüküm no: 344 Orijinal metin no: [62b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer için Karaman'dan alınacak olan deve katarlarının her biri için bir yedekçi bulundurularak İstanbul'a ulaştırılması Sûret-i fermân-ı yedek-keş Mefâhirü’l-kuzât ve’l-hükkâm ma‘denü’l-fezâil ve’l-hükkâm Karaman eyâletinden Âsitâne-i sa‘âdetime gelince yol üzerinde vâki‘ olan kādılar -zîde fazluhum- ve mefâhirü’l-emâsil ve’l-akrân kethüdâ yerleri ve yeniçeri serdârları ve ağayân-ı vilâyet iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, hâlâ teveccüh olunan sefer-i hümâyûnumda Istabl-ı âmirem mühimmâtı içün eyâlet-i mezbûrede vâki‘ sancaklardan mübâya‘ası fermânım olan yirmi beş katar develer inşâallâhu te‘âlâ mahallerinden ihrâc olundukda menzil be-menzil Dersa‘âdet’ime ulaşdırılması mühim ve muktezî olmağla mukaddemâ fermânım olunduğu üzere esnâ-i tarîkde lâzım gelen nafakaları mübâya‘asına memûr mübâşir yedinden verilmek üzere görülüp ve mübâya‘a mahallerinden İstanbul’a gelince mahsûs yedek-keş taleb olunmayıp ancak kazâdan kazâya erişdirilmek üzere taht-ı kazânızdan her bir katarına birer nefer yedek-keş ihrâc ve kazâ be-kazâ menzilden menzile ulaşdırılıp Âsitâne-i sa‘âdetime gelince irsâl ve îsâline takayyüd ve ihtimâm eylemeniz bâbında fermân-ı âlîşânım sâdır olmuşdur. Buyurdum ki, hükm-i şerîfimle (°) vardıkda bu bâbda sâdır olan emrim üzere amel edip dahi zikr olunan develer inşâallâhu te‘âlâ mahallerinden ihrâc ve yol üzerinde her kangi kazâya dâhil oldukda esnâ-i tarîkde lâzım gelen nafakaları mukaddemâ fermânım olduğu üzere mübâya‘asına memûr mübâşir yedinden verilmek üzere gördürüp ve mübâya‘a mahallerinden İstanbul’a gelince mahsûs yedek-keş taleb olunmayıp ancak kazâdan kazâya erişdirilmek üzere taht-ı kazânızdan her bir katarına birer nefer yedek-keş ihrâc ve kazâ be-kazâ menzilden menzile ulaşdırıp Âsitâne-i sa‘âdetime irsâl ve îsâline takayyüd ve ihtimâm edip avk u tehîrden ve ihmâl ve müsâmahadan ve hilâf-ı emr-i hümâyûn ta‘addî ve tecâvüzden be-gāyet ihtirâz eyleyesin, şöyle bilesin, alâmet-i şerîfe i‘timâd kılasın. Tahrîren fi’l-yevmi’t-tâsi‘ aşer Muharremi’l-harâm sene erba‘a ve ışrîn ve mi'e ve elf. Kostantıniyye el-mahrûse.