.:: İstanbul Kadı Sicilleri ::. 

Kartal Mahkemesi 1 Numaralı Sicil (H. 1128-1133 / M. 1716-1721)
cilt: 62, sayfa: 231
Hüküm no: 349
Orijinal metin no: [63a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Apolyanoz'un evini Ava'ya sattığı

Medîne-i Üsküdar kazâsı muzâfâtından Adalar nâhiyesine tâbi‘ Pendik nâm karye sâkinlerinden Apolyanoz v. Yorgi nâm zimmî mahfil-i kazâda bâ‘isü hâze’l-kitâb çoban tâifesinden Ava v. Petre mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Nikolaki nâm zimmî mülküne bir tarafdan Kuzu Reis mülküne bir tarafdan Coconi zimmî mülküne bir tarafdan tarîk-i âm ile mahdûd bir bâb fevkānî oda ve tahtında bir ekmekçi fırını ve bir mahzen ve bi'r-i mâ ve kenîfi müştemil mülk menzilimi bi-cümleti’t-tevâbi‘ ve’l-levâhık mezkûr Ava’ya tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile râyic fi’l-vakt iki yüz on guruşa bey‘ ve teslîm edip ol dahi minvâl-i muharrer üzere iştirâ ve tesellüm ve kabûl ve kabz eyledikden sonra semeni olan meblağ-ı mezbûr iki yüz on guruşu müşteri-i merkūm Ava zimmî yedinden tamâmen ahz u kabz eyledim, ba‘de’l-yevm menzil-i mahdûd-ı mezkûr, merkūm Ava zimmînin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu.

Tahrîren fi’l-yevmi’s-sâmin ve’l-ışrîn min-şehri Rebî‘i’l-âhir li-sene hamse ve ışrîn ve mi'e ve elf.

Şuhûdü’l-hâl: el-Hâc Mehmed b. el-Hâc Mustafa, Mehmed Beşe b. Musa, Mehmed Beşe b. Hasan, İbrahim Beşe b. Halil ve gayruhum.