.:: İstanbul Kadı Sicilleri ::. 

Kartal Mahkemesi 1 Numaralı Sicil (H. 1128-1133 / M. 1716-1721)
cilt: 62, sayfa: 232
Hüküm no: 350
Orijinal metin no: [63b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Bursa'daki Sultan Yıldırım Bayezid Vakfı'na ait Gebze'nin Tuzla köyünde, başka yerde üretilen tuz satışına izin verilmemesi

Hatt-ı hümâyûndur

Mûcebince amel oluna

Akzâ kuzâti’l-müslimîn, vâsıl olucak ma‘lûm ola ki, Bursa’da vâki‘ merhûm Sultan Yıldırım Bayezid Han’ın -tâbe serâhu- evkāfı mütevellîsi olan kıdvetü’l-emâsil ve’l-akrân Süleyman -zîde kadruhû- Dîvân-ı hümâyûnuma arzuhâl edip evkāf-ı mezbûre hatt-ı hümâyûn-ı şevket-makrûn mûcebince min-külli’l-vücûh serbest olup vakf-ı mezbûr mukāta‘alarından Üsküdar kazâsına tâbi‘ Tuzla nâm karyenin hudûdu ve örüsü dâhilinde âharın tuzu bey‘ olunmamak üzere emr-i şerîf-i âlîşân verilmişken Ahyolu tuzlası emîni olanlar mu‘ârazadan hâlî olmadıkları ecilden bundan akdem mürâfa‘a-i şer‘ olundukda vakfın tuzlasında hâsıl olan tuzdan mâ‘adâ âhardan tuz getirtip bey‘ olunmamak üzere hükm ve hüccet-i şer‘iye verilmekle verilen hüccet-i şer‘iye ve fermân-ı âlîşân Defterhâne-i âmire’ye kayd olunup mûcebince müdâhaleleri men‘ u def‘ olunmuş iken kanâ‘at eylemeyip memleha-i mezbûre emîni olanlar ve sâirleri müdâhaleden hâlî olmamaları ile cânib-i vakf-ı şerîfe küllî gadr ve zarâr tertîb eylediğini bildirip Defterhâne-i âmire’me kayd olunan hüccet-i şer‘iye derkenâr ve memleha-i mezbûre ümenâsının ve sâirlerinin vakf-ı mezbûr örüsü dâhilinde fürûht olunmamak bâbında emr-i şerîfim verilmek ricâ eylediği ecilden Defterhâne-i âmire’mde mahfûz olan defter-i evkāfa mürâca‘at olundukda Kocaeli sancağında Gekbüze nâhiyesinde ...? nâm-ı diğer Tuzla nâm karyenin hâsılı tahtında zabt ve mahsûl-i milh ma‘a mahsûlât-ı sâire elli dört bin yedi yüz altı akçe yazı ile Bursa’da vâki‘ merhûm ve mağfûrün-leh Sultan Bayezid Han’ın -tâbe serâhu- imâret-i âmireleri vakfı idiği derkenâr olunup ve tuz kānûnu görüldükde memâlik-i mahrûsemda olan tuzlaların örüsünde âharın tuzu fürûht olunmamak hilâf-ı kānûn olup birbirlerinin örülerinde tuz fürûht olunmayıp her emîn kendü örüsünde fürûht eylediği derkenâr olunmağla mûcebince amel olunmak bâbında fermân bâbında bin yüz yirmi Cumâdelûlânın on ikinci günü emr-i şerîfim verildi. Derkenâr olunup ve kadîmü’l-eyyâmdan bu âna gelince vakf-ı mezbûr hudûdu dâhilinde Zeytinburnu demekle ma‘rûf mahâlden Hünkâr nâm karyeye varınca vakf-ı mezbûrun örüsü olmağla vakf-ı mezbûr tuzlasında hâsıl olan tuz bey‘ olunagelip âharın tuzu bey‘ olunduğu ma‘lûmumuz değildir deyü husûs-ı mezbûra vukūf-ı tamm-ı olan bî-garaz Müslimînden cemm-i gafîr ve cem‘-i kesîr her biri alâ-tarîkı’ş-şehâde haber vermeğin mûcebiyle örü-yi merkūm dâhilinde kadîme mugāyir tuz bey‘inde ber-mûceb-i emr-i âlîşân men‘ u def‘ olunmak üzere bin yüz yirmi Cumâdelevvelinin on ikinci günü Adalar nâibi mevlânâ İsmail b. eş-Şeyh İbrahim’in -zîde ilmuhû- ve Üsküdar kādısı mevlânâ Abdullah’ın -zîde fezâiluhû- ve a‘lemü’l-ulemâi’l-mütebahhirîn Rumeli kazaskeri mevlânâ Abdullah b. Ârif’in -edâmallâhu te‘âlâ fezâiluhû- imzâlarıyla mümzâ ve mahtûm verilen hüccet-i şer‘iye ve fermân-ı âlîşânımla Defterhâne-i âmire’mden hıfz olunmak üzere kayd olunduğu derkenâr ve arz olunmağla imdi Defter-i hâkānî ve hıfz olunan hüccet-i şer‘iye ve mukaddemâ verilen emr-i şerîf mûcebince zabt ve müdâhaleden men‘ u def‘ olunmak bâbında fermân-ı âlîşânım sâdır olmuşdur. Buyurdum ki hükm-i şerîfimle vardıkda bu bâbda sâdır olan fermân-ı celîlü’l-kadrim mûcebince amel edip dahi Defter-i hâkānî ve vech-i meşrûh üzere Defterhâne-i âmire’me kayd olunan hüccet-i şer‘iye ve mukaddemâ verilen evâmir-i şerîfime mugāyir memleha-i mezbûre emînleri tarafından ve sâirden vakf-ı mezbûr örüsü dâhilinde âharın tuzu fürûht etdirmeyip vakf-ı mezbûrun kendü mahsûlü olan tuzun fürûhtuna dahi müdâhale ve mümâna‘at etdirmeyesin, cânib-i vakfa gadr ve zarâr olunmakdan be-gāyet ihtirâz edesin, şöyle bilesin, alâmet-i şerîfe i‘timâd kılasın.

Fi’l-yevmi’s-sânî ve’l-ışrîn min-Zilka‘de li-sene selâse ve ışrîn ve mi'e ve elf.

Be-makām-ı Kostantıniyye el-mahrûse.