|
Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 234 Hüküm no: 353 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Sefere çıkacak donanma ihtiyacı için gerekli kerestenin kesilip gönderilmesi
Kıdvetü’n-nüvvâb ve’l-müteşerri‘în Yoros kazâsında nâibü’ş-şer‘ olan mevlânâ -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ evvel-i bahârda rûy-ı deryâya ihrâc mühim olan Donanma-yı hümâyûnum kalyonları ile ma‘an ihrâc olunacak fırkate kalyatalar inşâsı levâzımı içün Üsküdar muzâfâtından Adalar nâhiyesinde ve Yoros kazâsında bundan akdem kat‘ ve nakli fermân olan ecnâs-ı kereste bu âna değin kat‘ ve Tersâne-i âmire’me teslîmi ziyâde mühim ve muktezî iken hâlâ bu âna değin gelüp erişmeyip tehîre kalmağla imdi sen ki nâib-i mezbûrsun hâlâ Tersâne-i âmire’mde müceddeden inşâsı fermân olan fırkate ve kalyatalar için kazâ-i mezbûreden kat‘ ve nakl fermânım olan ecnâs-ı keresteleri mukaddemâ Tersâne-i âmirem tarafından gönderilen defter mûcebince bir gün evvel kat‘ ve nakletdirip bir ân evvel teslîm-i Tersâne-i âmirem olunmak ziyâde mühim ve muktezî olunmağla işbu emr-i şerîfim vardığı sâ‘atde kat‘â bir ferde bir dürlü illet ve bahâne etdirmeyip mukaddemâ fermânım olduğu üzere zikr olunan ecnâs-ı keresteleri bir gün evvel kat‘ ve iskele-i mezbûreye nakl ve sefinelere vaz‘ u tahmîl ve ber-vech-i müsâra‘at Tersâne-i âmireme nakl ve teslîm etdirilmek bâbında fermânım olmuşdur. Buyurdum ki hükm-i şerîfimle vardıkda bu bâbda sâdır olan emrim üzere amel edip sen ki nâib-i mezbûrsun zikr olunan ecnâs-ı keresteleri Devlet-i aliyyemin ehem ve a‘zam umûrundan olan Tersâne-i âmirem mühimmâtı lâzımesi içün olmağla bu bâbda bir ferde bir dürlü illet ve bahâne etdirmeyip mukaddemâ fermânım olduğu üzere gönderilen liman defteri mûcebince alâ-eyyi hâlin mu‘accelen tedârik ve kat‘ ve nakletdirmekde kemâl-i takayyüd ve ihtimâm eyleyip avk u tehîrden ve bir dürlü ihmâl ve müsâheleden be-gāyet ihtirâz eyleyip bir gün evvel sefinelere tahmîl ve mevsim-i deryâ ile teslîm-i Tersâne-i âmirem etdirdip işbu emr-i âlîşânımın mazmûn-ı münîfi birle âmil olasın, şöyle bilesin, alâmet-i şerîfime i‘timâd kılasın.
El-yevmü’s-sâmin ve’l-ışrîn şehri Şevvâli’l-mükerrem sene ışrîn ve mi'e ve elf.
|