.:: İstanbul Kadı Sicilleri ::. 

Kartal Mahkemesi 1 Numaralı Sicil (H. 1128-1133 / M. 1716-1721)
cilt: 62, sayfa: 235
Hüküm no: 355
Orijinal metin no: [64b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hüseyinli köyünde bazı evleri basıp eşkıyalık edenlerin yakalanması

İftihârü’l-emâcid ve’l-ekârim câmi‘ü’l-mehâmid ve’l-mekârim el-muhtassu bi-mezîdi inâyeti’l-talebi’d-dâim hâssa bostancıbaşı -dâme mecdühû- ve mefâhirü’l-kuzât ve’l-hükkâm makālü’l-fezâil ve’l-kelâm ve (°) ve (°) ve (°) kādıları Yoros nâibi -zîde fazluhum- tevkī‘-i refî‘-i hümâyûnum vâsıl olucak ma‘lûm ola ki, haydûd eşkıyâlarından otuz kırk nefer şakīler gece vakti Yoros kazâsına tâbi‘ Hüseyinli nâm karyeye varıp Mustafa ve Himmet ve Hüseyin nâm kimesnelerin menzillerini basıp emvâl ve eşyâlarını nehb ü gāret eylediklerinden mâ‘adâ kızgın taş ile işkence ve envâ‘-ı eziyet ve zulm ü ta‘addî eyledikleri ba‘zen haber olunmağla, sen ki bostancıbaşı-yı mûmâ-ileyhsin bu makūle fezâhat ve şenâ‘at eden senden matlûb olmağla imdi tarafınıza mukaddem ve kâr-güzâr ve müstakīmü’l-kavl ve mu‘temedün-aleyh hâssınız ta‘yîn ve Yoros kazâsı havâlîsinde zikr olunan kazâlarda sırran ve alenen tecessüs ve bu makūle kulları cesâret eden erbâbı kulları bi-eyyi hâlin ahz ve kayd-ı bend ile Âsitâne-i sa‘âdetime ihzârlarına kemâl-i ...? takayyüd ve ihtimâm eyleyesiz ammâ bu takrîr ile umûm nefsinden ve kendü hallerinde olanların nüfûs ve emvâl ve a‘râzlarına ta‘arruzda ve hilâf-ı şer‘-i mutahhar kimesneye cevr ü ta‘addîden ihtirâz eylemeniz fermân-ı âlîşânım sâdır olmuşdur, buyurdum ki vusûl buldukda bu bâbda vech-i meşrûh üzere şeref-yâfta-i sudûr olan fermân-ı vâcibü’l-ittibâ‘i’l-lâzım mazmûn-ı itâ‘at-makrûnuyla âmil olasın, şöyle bilesin, alâmet-i şerîfe i‘timâd kılasın.

Tahrîren fî-yevmi’s-sânî aşer min-Rebî‘i’l-evvel sene hamse ve ışrîn ve mi'e ve elf.