.:: İstanbul Kadı Sicilleri ::. 

Kartal Mahkemesi 1 Numaralı Sicil (H. 1128-1133 / M. 1716-1721)
cilt: 62, sayfa: 236
Hüküm no: 356
Orijinal metin no: [65a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Rusya üzerine yapılacak sefer için sürsat bedellerinin tahsili

Yâ Fettâh

Mefâhirü’l-kuzât ve’l-hükkâm ma‘âdinü’l-fazl ve’l-kelâm Kocaeli sancağında vâki‘ olan kazâların kādıları -zîde fazluhum- ve mefâhirü’l-emâsil ve’l-akrân kethüdâ yeri ve yeniçeri serdârı ve a‘yân-ı vilâyetin iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, sinîn-i sâbıkāda sefer-i hümâyûn vâki‘ oldukda sefer-i hümâyûna memûr olan asâkir-i İslâm’ın zâd [ü] zahîreleri için Rumeli ve Anadolu câniblerinden menâzili karîb kazâlardan aynî zahîre ihrâc ve ba‘îd olan kazâdan sürsat bedelleri tahsîl oluna gelip lâkin karîb olan aynî sürsat zahîresi nakli re‘âyâ fukarâsına müte‘assir olduğundan iktizâ eden zehâir bulunan mahallerden mübâya‘a olunup naklolunmak üzere bir kaç Engürüs seferlerinde ale’l-umûm bütün sürsat bedelleri oluna geldiği Hazîne-i âmire’de mahfûz olan mevkūfât defterlerinde mukayyed bulunmağın inşâallâhu te‘âlâ evvel-bahâr-ı huceste-âsârda bu def‘a yine nakz-ı ahd eden Moskov keferesi üzerine bi’l-fi‘il sefer-i hümâyûnum mukarrer ve muhakkak olmağla dâire-i hümâyûnum ve kapım kulları ve sâir asâkir-i nusret-makrûna lâzım gelen zâd [ü] zahîreleri bulunan mahallerden mübâya‘a ve menâzile ihzâr olunmak için bin yüz yirmi beş senesine mahsûb olmak üzere memâlik-i mahrûsemda Rumeli ve Anadolu câniblerden umûm üzere sürsat zahîresi bedelleri tahsîli bâbında hatt-ı hümâyûnum sâdır olmağın taht-ı kazâlarınızda sene-i sâbıkā üzere on yedi bin yedi yüz yirmi yedi buçuk guruş sürsat bedellerini mu‘accelen tahsîl ve dâhil-i Hazîne-i âmirem etdirmeniz lâzım gelmeğin ta‘yîn olunan mübâşirin yedine verilen mühürlü ve nişânlı mevkūfât defteri sûreti mûcebince cem‘ ü tahsîl ve dâhil-i Hazîne-i âmirem etdirilmek üzere fermân-ı hümâyûnum olmuşdur, buyurdum ki, hükm-i şerîfimle (°) vardıkda bu bâbda sâdır olan emrim üzere amel edip dahi târîh-i mezbûra mahsûb olmak üzere ol mikdâr guruş sürsat bedelleri mâlın mübâşir-i mezbûrun yedine verilen mühürlü ve nişânlı mevkūfât defteri sûreti mûcebince cem‘ ü tahsîl ve bir gün evvel dâhil-i Hazîne-i âmirem etdirmekde her biriniz ziyâde dikkat ve ihtimâm eyleyesiz ve mübâşir-i mezbûrun vech-i ma‘âşı içün asıl mîrî akçenin her bin guruşunda on ikişer buçuk guruş ta‘yîn olunmağla bundan mâ‘adâ mübâşiriye ve mahkeme harcı ve temessük harcı ve sarrâfiye ve zahîre akçesi ve sâir bir dürlü illet ve bahâne ile bir akçe ve bir habbe aldırmayasız ve Re‘âyâ fukarâsından bir tarîk ile kat‘â bir akçe ziyâde tahsîl olunduğuna rızâ-yı hümâyûnum yokdur bilmiş olasız ve zikr olunan sürsat bedellerin mâlından mu‘âf ve gayr-ı mu‘âf dâhillerdir cümleye ale’s-seviyye tevzî‘ ve edâ etdirilip bir ferde ta‘allül ve nizâ‘ etdirmeyesiz, sen ki kādılar ve kethüdâ yerleri ve yeniçeri serdârları ve a‘yân-ı vilâyetin iş erleri zikr olunan sürsat zahîresi bedeli asâkir-i İslâm’ın zâd [ü] zahîreleri için olmağla cümleden mukaddem tevzî‘ ve tahsîl ve teslîm-i Hazîne-i âmirem etdirmekde her biriniz ziyâde dikkat ve ihtimâm edip avk u tehîrden ve ihmâl ü müsâheleden be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız.

Tahrîren fi’l-yevmi’s-sânî aşer min-Zilhicce li-sene erba‘a ve ışrîn ve mi'e ve elf.