.:: İstanbul Kadı Sicilleri ::. 

Kartal Mahkemesi 1 Numaralı Sicil (H. 1128-1133 / M. 1716-1721)
cilt: 62, sayfa: 241
Hüküm no: 374
Orijinal metin no: [67a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hüseyin'i haksız yere öldüren katillerin saklandıkları yerden alınarak muhakeme edilmesi

Kıdvetü’n-nüvvâb ve’l-müteşerri‘în Üsküdar kazâsı muzâfâtından Adalar nâhiyesinde nâibü’ş-şer‘ olan mevlânâ -zîde ilmuhû- tevkī‘-i refî‘-i hümâyûn vâsıl olucak ma‘lûm ola ki, Hasan nâm kimesne ile ve (°) ve (°) ve (°) nâm sagīrlerin cânib-i şer‘den mansûb vasîleri Halil nâm kimesne südde-i sa‘âdetime arzuhâl edip mezkûr Hasan’ın oğlu ve eytâm-ı sıgārın babaları Hüseyin nâm kimesneyi nâhiye-i mezbûra tâbi‘ Pendik nâm karye sâkinlerinden Halil ve Abdi nâm şakīlerin bin yüz yirmi senesinde bi-gayri hakkın katl etmeleriyle mezkûrlar ahzolundukların nâhiye-i mezbûra tâbi‘ Dolayoba nâm karye sâkinlerinden mezkûr Halil’in eniştesi Ali ve şerîki Ahmed ve mezkûr Abdi’nin babası Hüseyin ve karındaşı Ömer nefislerine kefîl olmalarıyla kefâletlerine binâen mezkûr ihzâr-ı şer‘ ve icrâ-yı hak etdirilmek istediklerinde, kātillerini ihtifâ ve askerîlik iddi‘âsında olmalarıyla vermeyip ziyâde gadr ü ta‘addî eylediklerin bildirip zâbitleri ma‘rifetiyle şer‘le görülüp icrâ-yı hak olunmak bâbında emr-i şerîfim ricâ eyledikleri ecilden mahâllinde zâbitleri ma‘rifetiyle şer‘le görülüp icrâ-yı hak ve i‘lâm olunmak emrim olmuşdur, buyurdum ki, hükm-i şerîfimle vusûl buldukda bu bâbda sâdır olan emrim üzere amel dahi zâbitleri ma‘rifetiyle meclis-i şer‘a ihzâr ve mürâfa‘a-i şer‘ edip mukaddemâ bir def‘a şer‘le görülüp fasl olunmayan husûsların hak ve adl üzere mukayyed olup göresin, arz olunduğu üzere ise ol bâbda muktezâ-yı şer‘-i kavîmle amel edip dahi ba‘de’s-sübût zâbitleri ma‘rifetiyle icrâ ve vâki‘ hâli Âsitâne-i sa‘âdetime arz ve i‘lâm eyleyip min-ba‘d şer‘-i şerîfe ve emr-i hümâyûnuma muhâlif kimesneye iş etdirmeyip husûs-ı mezbûr için bir dahi murâd eylemeyesin, şöyle bilesin, alâmet-i şerîfe i‘timâd kılasın.

Tahrîren fî-evâili Rebî‘i’l-evvel li-sene tis‘a ve ışrîn ve mi'e ve elf.

Kostantıniyye el-mahrûse.

Kad vasale ileynâ fî 12 Rebî‘ülevvel sene [1]129