.:: İstanbul Kadı Sicilleri ::. 

Kartal Mahkemesi 1 Numaralı Sicil (H. 1128-1133 / M. 1716-1721)
cilt: 62, sayfa: 279
Hüküm no: 430
Orijinal metin no: [83a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Varissiz olarak vefat eden askerî tâifesinden olanların mallarının satılarak beytülmale teslimi

Mefâhirü’l-kuzât ve’l-hükkâm ma‘âdinü’l-fezâil ve’l-kelâm Anadolu’da orta kolu nihâyetine varınca yol üzerinde ve yemîn ve yesârında vâki‘ olan kādılar -zîde fazluhum- ve mefâhirü’l-emâsil ve’l-akrân zikr olunan kazâlarda vâki‘ yeniçeri serdârları ve a‘yân-ı vilâyet ve iş erleri -zîde kadruhum- tevkī‘-i refî‘-i hümâyûn vâsıl olucak ma‘lûm ola ki, taht-ı kazâlarınızda sâkin ve mukīm ve müsâfirîn yeniçeri ve cebeci ve topçu ve top arabacısı ve kuloğulları ve sekbân ve süvârî ve gılmân-ı acemî tâifelerinden bilâ-vâris-i ma‘rûf fevt olanların muhallefât ve metrûkâtların ma‘rifet-i şer‘le serdârlar ahz u kabz ve sûkda fürûht ve hâsıl olan nükūdu mümzâ ve mahtûm müfredât defteriyle cânib-i beytülmâle irsâl ve îsâli yeniçeri serdârlarının zabıt mektûblarında musarrah iken yeniçeri serdârları ve kādılar dahi kendü menfa‘atleri içün himâye ve hâsıl olan beytümâli ekl ü bel‘ edip bu vechile ibâdullâha ve beytülmâl-i Müslimîne küllî gadr olunmağın üç seneden berü vâki‘ olan beytülmâl sicillât-ı mahfûzadan yoklanıp sıhhati üzere arz u i‘lâm olunmak üzere bundan akdem bir kaç def‘a ocak tarafından mektûb tahrîr ve mahsûs mübâşirler gönderildikde vilâyet kādıları kendü menfa‘atleri içün def‘ ve üç seneden berü kazâmızda tâife-i mezbûre beytülmâli vâki‘ olduğu yokdur deyü mübâşir yedlerine arz verip beytülmâl-i Müslimîn ketm ü ihfâ ve mîrîye gadr ü ta‘addîleri zâhir ve müte‘ayyen olmağla memâlik-i mahrûseda olan kazâlarda üç seneden berü tâife-i mezbûreden bilâ-vâris-i ma‘rûf fevt olanları sicillât-ı mahfûzadan yoklanıp vâki‘ olan beytülmâl kalîl ve kesîr her ne ise müfredât üzere tahrîr ve defter ve kabz eden serdârlar ism ü resmleriyle arz ü i‘lâm olunup bundan sonra dahi cânib-i mîrîye gadr tasaddî ve beytülmâl-i Müslimîn ketm ü ihfâ ile izâ‘ata cesâret ederler ise sırran ve alenen tecessüs olunup zâhir oldukda ol vilâyetin kādısı azledivericek ve serdârlar ve a‘yân-ı vilâyet ta‘zîr misillü hâlât ile mücâzât olunacakları mukarrer ve muhakkak bilip bir akçesi ketm ü ihtifâ olunmamak üzere sicillât-ı mahfûzadan yoklanıp sıhhati üzere arz u i‘lâm olunmak için elli bir bölüğün Ebubekir Çavuş mübâşir ta‘yîn ve irsâl olunmağla vech-i meşrûh üzere zikr olunan kazâlar üç seneden berü bilâ-vâris-i ma‘rûf fevt olan tâife-i mezbûrenin muhallefâtın ve metrûkâtın ma‘rifet-i şer‘le ve serdâr ve a‘yân-ı vilâyet ma‘rifetleriyle sicillât yoklanıp müfredât üzere tahrîr ve defter ve kabz eden serdârları ism ü resm ve şöhretleriyle mübâşir-i merkūm ma‘rifetiyle Der-i devlet-medâra arz u i‘lâm eyleyesiz deyü düstûr-ı mükerrem müşîr-i müfahham nizâmü’l-âlem ve vezâretle Dergâh-ı mu‘allâm yeniçeri ağası olan Abdullah Paşa -edâmallâhu te‘âlâ iclâlehû- tarafından mühürlü mektûb verilmeğ[in] mûcebince amel olunmak bâbında fermân-ı âlîşânım sâdır olmuşdur. Buyurdum ki vusûl buldukda bu bâbda sâdır olan fermân-ı celîlü’l-kadrim ve müşârün-ileyh taraflarından verilen mühürlü mektûb mûcebince amel eyleyip hilâfına rızâ ve cevâz göstermeyesiz, şöyle bilesiz, alâmet-i şerîfe i‘timâd kılasız.

Tahrîren evâsıtı Şevvâl sene 1130

Mahrûse-i Edirne.

Kad vasale ileynâ fî 3 Zilka‘de