|
Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 286 Hüküm no: 442 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Maandi'nin ölmüş olan Çoban İstimat'ta alacağı olduğu
Medîne-i Üsküdar muzâfâtından Adalar nâhiyesine tâbi‘ Kartal nâm karye mütemekkinlerinden işbu bâ‘isü’s-sifr Maandi v. Belo nâm zimmî meclis-i şer‘-i enverde karye-i mezbûre mutavattınlarından iken bundan akdem hâlik olan Çoban İstimat v. Niko[la] v. İstiko nâm zimmînin zevce-i metrûkesi gāibe ani’l-meclis Desponi bt. Yanaki nâm Nasrâniyeden gayri zâhir[de] vâris-i ma‘rûfu olmamağla bostancıbaşı ağa hazretleri taraflarından beytülmâl kabzına memûr Haseki İbrahim Ağa b. Şahbaz tarafından ahz u kabza sâbitü’l-vekâlesi olup tereke-i hâlik-i merkūmdan defter-i kassâm mantûkunca on beş bin beş yüz seksen akçeye hâlâ vâzı‘u’l-yed olan Hüseyin Bey b. Osman nâm kimesne mahzarında üzerine da‘vâ ve takrîr-i kelâm edip hâlik-i merkūm İstimat zimmetinde cihet-i deyn-i şer‘îden otuz dört bin akçe hakkım olup hattâ hâl-i hayatında huzûr-ı Müslimînde ikrâr ve istişhâd edip kable’l-edâ hâlik olmağla hâlâ tereke-i vâfiyesinden taleb ederim dedikde gıbbe’s-suâl defter-i kassâm mantûkunca on beş bin beş yüz seksen akçe vaz‘-ı yedini ikrâr lâkin müdde‘î-i mezbûrun ber-vech-i meşrûh müdde‘âsını inkâr edicek müdde‘î-i mezbûr müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden ve karye-i mezbûre sâkinlerinden Hüseyin Çelebi b. Ali ve Mehmed Ağa b. Ahmed ve Mehmed Beşe b. Hasan nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka hâlik-i merkūm İstimat v. Nikola v. İstiko hâl-i hayatında bizim huzûrumuzda müdde‘î-i merkūm Maandi’ye cihet-i mezkûreden otuz dört akçe deyni olduğunu ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘î mûcebiyle hüküm.
|