|
Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 124 Hüküm no: 43 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Ahmed’in ölmeden önce cariyesi Fatıma’yı azat ettiğinin ispat edildiği
Müteveffâ-yı câi’z-zikre rıkk-ı sâbıkını mu‘terife işbu açık kaşlı elâ gözlü orta boylu Sırfatiyyetü’l-asl? Müslimetü’l-mille hâfızatü’l-vesîka Fâtıma bt. Abdullah mahfil-i kazâda mahmiye-i İstanbul’da Göngörmez mahallesi ahâlîsinden olup düyûnu terekesinden ezyed olduğu hâlde vefât eden Ahmed Efendi b. Mustafa’nın tesviye-i umûruna savb-ı şer‘den mansûb vasîsi olmağla terekesine vâzı‘u’l-yed olan es-Seyyid Mehmed b. Ahmed muvâcehesinde üzerine da‘vâ ve takrîr-i kelâm edip seyyidim müteveffâ-yı mezbûr Ahmed Efendi b. Mustafa hâl-i kemâl-i sıhhatinde fevtinden beş sene mukaddem beni mülkünde olduğum hâlde malından hasbeten lillâhi’l-hayyi’l-kadîr i‘tâk ve tahrîr etmekle hürre olmuş iken vasiyy-i mezbûr rıkka olup terekeden olmak zu‘muyla bana bi-gayr-ı hakkın vaz‘-ı yed eder suâl olunup sebîlim tahliye olunmak murâdımdır dedikde gıbbe’s-suâl ve’l-inkâr müdde‘iye-i mezbûreden müdde‘âsına beyyine taleb olundukda udûl-ı Müslimînden mahalle-i merkūme sükkânından Ahmed Çelebi b. Hasan ve diğer Ahmed b. Mustafa li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr hâl-i kemâl-i sıhhatinde fevtinden beş sene mukaddem işbu müdde‘iye-i mevsûfe-i merkūme Fâtıma bt. Abdullah’ı mülkünde olduğu hâlde huzûrumuzda malından hasbeten lillâhi’l-hayyi’l-kadîr i‘tâk ve tahrîr eyledi biz bu husûsa minvâl-i muharrer üzere şâhidleriz şehâdet dahi ederiz [deyü] her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd.
Fî 13 Muharrem sene 1110
Şuhûdü’l-hâl: Es-sâbikūn es-sâbikūn.
|