İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 113 Hüküm no: 56 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maksim v. Hacı Hıristo’nun annesinden kendisine miras kalan ekmek fırını hisselerinin kendi mülkü olduğunu gösterecek hüccet talebi Habbâz ihbârı. Kaydı ihrâc şüd fî 22 Muharrem sene [1]327 Kezâlik vilâyet-i Rumeli’de Üsküp kazasına tâbi‘Bacişka karyesinde sâkine iken bundan mukaddem fevt olan teba‘a-i Devlet-i aliyye’nin Rum milleti nisvânından Despino bt. İstoyani v. Istinço’nun sadrî kebîr oğlu ve hasren vârisi olup teba‘a-i Devlet-i aliyye’den olduğu ba ilmühaber mütehakkık olan ekmekçi esnâfı tablakârlarından bâ‘isü’r-rakīm Maksim v. Haci Hıristo meclis-i şer‘-i şerîf-i hatîrde esnâf-ı merkūme kethüdâsı İbrahim Ağa b. Ahmed ile mazbûtü’l-esâmî nizâm ustaları taraflarından mürsel vekîlleri esnâf-ı merkūme yiğitbaşısı es-Seyyid İsmail Efendi b. es-Seyyid Mehmed Emin ve salıcılarından el-Hâc Mehmed Ağa b. Ali ve Ahmed Ağa b. Hasan ve Mehmed Ağa b. Ali ve esnâf-ı merkūmeden Kasım Ağa b. Receb hâzır oldukları hâlde takrîr-i kelâm ve ta‘bîr ani’l-merâm edip mahmiye-i İstanbul’da Sarıkız kurbünde vâki‘ bir tarafdan devletlü Yahya Paşa hazretlerinin konağı ve ba‘zen Ebubekir Efendi bahçesi ve bir tarafdan tarîk-i hâs ve tarafeyni tarîk-i âm ile mahdûd merhûm Şah Mehmed Efendi Vakfı musakkafâtından Hüseyin Efendi’nin bi’l-icâreteyn taht-ı tasarrufunda olan şehriye yirmi beş guruş kirâlı Sarıkız fırını demekle arîf bir bâb habbâz fırını derûnunda vâki‘ şehriye yirmi beş guruş kirâlı beş horoslu bir bâb habbâz değirmeni derûnunda mevcûde beyne’l-esnâf gedik ta‘bîr olunur yirmi re’s bârgir ve onlara tâbi‘ sâir âlât-ı lâzime-i ma‘lûmenin on altı re’s bârgir ve onlara isâbet eden âlât-ı sâiresi âharların ve mâ‘adâ dört bârgir ve onlara îcâb eden âlât-ı sâiresi dahi dört bin dokuz yüz altmış dört sehm i‘tibârıyla iki bin sekiz yüz doksan iki sehm hisse-i şâyi‘ası âharların yedlerinde mülkleri olup mâ‘adâ iki bin yetmiş iki sehm hisse-i şâyi‘ası dahi yedimde olup bin iki yüz altmış bir senesi Cumâdelûlâsı’nın ikinci günü târihiyle müverraha ve ol târihde Dârü’l-hilâfeti’l-aliyye kādısı olan Paşmakçızâde es-Seyyid İbrahim Efendi merhûmun sicillinden muhrece işbu bir kıt‘a kayd-ı hüccet-i şer‘iyye ve kethüdâ-yı mezbûrun takdîm eylediği bir kıt‘a ilmühaber mantûklarınca anam ve mûrisem merkūme Despino’nun hayâtında ile’l-fevt yedinde mülkü ve ba‘de fevtihâ ancak bana mevrûs olup lakin sâlifü’l-beyân dört re’s bârgir ve onlara îcâb eden âlât-ı sâirenin ber i‘tibâr-ı merkūm iki bin yetmiş iki sehm hisse-i şâyi‘ası ber-vech-i meşrûh mülküm olduğunu nâtık yedimde sened-i şer‘î olmamağla hakīkat-ı hâl vukūf-ı tâmları olan kimesnelerden istihbâr ve suâl olunup haberleri tahrîr ve imlâ ile kıbel-i şer‘den zikr olunan dört re’s bârgir ve onlara îcâb eden âlât-ı sâirenin ber i‘tibâr-ı merkūm iki bin yetmiş iki sehm hisse-i şâyi‘ası ber-minvâl-i muharrer mülküm olduğunu nâtıka yedime bir kıt‘a hüccet-i şer‘iyye i‘tâ buyurulmak murâdımdır deyu istid‘â etdikde hâl merkūm Maksim’in bâlâda bast ve beyân eylediği minvâl üzere olduğunu husûs-ı mezkûre vukūf-ı tâmları olan esnâf-ı hâzırûn-ı merkūmûni alâ tarîki’ş-şehâde haber vermeleriyle vâki‘-i hâl hıfzan li’l-makāl işbu vesîka-i enîka ketb ü imlâ olundu . Fî 15 Muharrem sene 1279 Şuhûdü’l-hâl: Muhzır Süleyman Ağa b. ( ), Muhzır Şakir Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum