İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 147 Hüküm no: 83 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu İstefan v. Parsih’in tütüncü dükkânını Abraka bt. müteveffâ Artin’e satması Tütüncü mübâya‘ası 30000 guruş Kezâlik mahmiye-i İstanbul hısnı ebvâbından Bahçe kapısı hâricinde vâki‘ Şabcı Hân’ında sâkin teba‘a-i Devlet-i aliyye’nin Ermeni milletinden Kuyumcu İstefan v. Parsih meclis-i şer‘-i hatîrde medîne-i Üsküdar’da Selami mahallesinde sakin teba‘a-i Devlet-i aliyye’nin Ermeni milleti nisvânından olduğu bâ-ilmühaber mütehakkık olan bâ‘isetü’r-rakīm Abraka bt. el-müteveffâ tüccârdan Artin v. Adam’ın zevci ve tarafından husûs-ı âti’l-beyânda tasdîka vekîl-i şer‘îsi teba‘a-i Devlet-i aliyye’nin Ermeni milletinden ve Avrupa tüccârından Papasoğlu Artin v. Papas Barnabas muvâcehesinde tütüncü esnâfının kethüdâsı el-Hâc Mehmed Latif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan lonca ihtiyârları taraflarından mürsel kethüdâ vekîli Ahmed Efendi b. Osman hâzır olduğu hâlde ikrâr-ı tâm ve takrîr-i kelâm edip mahmiye-i mezkûrede Kumkapı hârici ittisâlinde vâki‘ bir tarafdan cidâr-ı hısn ve bir tarafdan Sultan Süleyman Hân hazretleri çeşmesi ve tarafeyni tarîk-i âm ile mahdûd Eshâm Muhâsebesi Kalemi’nde Ahmed Ağa ismine mukayyed Ayasofya-i Kebîr Câmi’-i şerîfi ve cennet-mekân adn-i âşiyân Ebü’l-feth Sultan Mehmed Hân aleyhi sicâlü’l-gufrân hazretlerinin evkāf-ı celîleleri musakkafâtından benim bâ-temessük-i mütevelli bi’l-icâreteyn taht-ı tasarrufumda olan şehriye dört guruş kirâlı bir bâb tütüncü dükkânı ve ona merbût mahall-i mezkûrde vâki‘ bir tarafdan müşârün-ileyh Sultan Süleyman Hân hazretleri çeşmesi ve bir tarafdan cidâr-ı hısn ve bir tarafdan Kürkçübaşı merhûm Süleyman Ağa Vakfı’ndan abdesthâne kapısı ve taraf-ı râbi‘itarîk-i âm ile mahdûd müşârün-ileyh Sultan Mehmed Hân hazretleri ve mûmâ-ileyh Süleyman Ağa vakıfları musakkafâtından kezâlik benim mütevellileri temessükü mantûkunca bi’l-icâreteyn taht-ı tasarrufumda olan şehriye iki guruş kirâlı bir bâb ahşâb mağaza derûnlarında mevcûde beyne’l-esnâf gedik ta‘bîr olunur âlât-ı lâzime-i ma‘lûme akd-i âti’z-zikrin sudûruna değin şehr-i sâbık Şevvali’l-mükerremin onuncu günü târihiyle müverrah İstanbul Mahkemesi’ndeni‘tâ olunan işbu bir kıt‘a mübâya‘a hücceti ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben ber-minvâl-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile otuz bin guruşa müvekkile-i merkūme Abraka’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm otuz bin guruşu tamamen bana def‘ u teslîm ben dahi yedinden bi’t-tamâm ve’l-kemâl ahz u kabz edip ba‘de’l-yevm âlât-ı gedik-i mezkûrde benim aslâ ve kat‘â alâka ve medhalim kalmayıp müvekkile-i merkūme Abraka’nın mülk-i müşterâsı ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 28 Zilka‘de sene 1278 Şuhûdü’l-hâl: Muhzır Mustafa Ağa b. ( ), Muhzır Mehmed Ağa b. ( ), Muhzır Süleyman Ağa b. ( ), Muhzır Feyzullah Ağa b. ( ), ve gayruhum