İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 149 Hüküm no: 84 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yorgi’nin tütüncü dükkânını Dimitri v. Kara Nikolaoğlu Kosta’ya satması Tütüncü mübâya‘ası 7000 guruş Âsitâne-i sa‘âdet âşiyâne ve bilâd-ı selâse mahkemelerine bâ-fermân-ı âlî mine’l-kadîm merbût olan duhâncı gedikleriyle sâir gerek Dersaâdet ve gerek bilâd-ı selâse-i mezkûrede kâin ber-vech-i mülkiyet tasarruf olunmakda bulunan her nev‘ gediklerin mübâya‘a ve ikrâr-ı mülk ve hibe ve irsen intikāl misillü kâffe-i mu‘âmelâtı ve vukū‘ bulan muhâkemâtı münhasıran ve mahsûsan İstanbul Mahkemesi’nden icrâ ve iktizâ eden i‘lâm ve hüccet-i şer‘iyyeleri ancak mahkeme-i mezkûre tarafından i‘tâ olunmak ve gedikât ashâbının rızâ ve muvâfakatları olmadıkça kadîm mülk kirâları tezyîd olunmamak ve senedât-ı sahîha ve mu‘tebere ile ber-vech-i mülkiyet tasarruf olunmakda bulunan gediklerin müstakır oldukları mahalden ihrâc ve imhâsı zımnında mülk sâhibleri tarafından da‘vâya tasaddî olunur ise hükkâm-ı şer‘-i şerîf cânibinden istimâ‘ olunmaması bâlâsı tuğrâ-yı garrâ-yı hazret-i cihân-bânî ile muvaşşah ve müzeyyen bir kıt‘a nizâmnâme ve bâ-fermân-ı âlî müesses olan nizâm-ı müstahsene iktizâsından bulunduğuna binâen teba‘a-i Devlet-i aliyye’nin Rum milletinden ve tütüncü esnâfından Dimitri v. Yorgi meclis-i şer‘-i şerîf-i hatîrde esnâf-ı merkūmeden ve teba‘a-i Devlet-i aliyye’nin Rum milletinden olduğu bâ-ilmühaber mütehakkık olan bâ‘isü’r-rakīm diğer Dimitri v. Kara Nikolaoğlu Kosta muvâcehesinde esnâf-ı merkūme kethüdâsı el-Hâc Mehmed Latif Efendi b. İsmail ile duhân tüccarından mazbûtü’l-esâmî on nefer müslim ve beş nefer hıristiyan taraflarından mürsel vekîlleri esnâf-ı merkūme yiğitbaşısı Ahmed Ağa b. Ali hâzır olduğu hâlde ikrâr-ı tâm ve takrîr-i kelâm edip mahmiye-i İstanbul hısnı ebvâbından Cibali kapısı hâricinde Seferikoz mahallesinde İspenciyar dükkânı karşısında cidâr-ı hısna muttasıl bir tarafdan Keresteci Süleyman Efendi’nin tönbekici dükkânı ve bir tarafdan cidâr-ı hısn ve bir tarafdan kunduracı dükkânı ve taraf-ı râbi‘i tarîk-i âm ile mahdûd Ayasofya-i Kebîr Câmi’-i şerîfi evkāf-ı celîlesi müsakkafâtından A‘ma Hasan Efendi’nin bi’l-icâreteyn taht-ı tasarrufunda olan şehriye üç buçuk guruş kirâ-yı kadîmelüEshâm Muhâsebesi kaleminde Ahmed ismine mukayyed bir bâb tütüncü dükkânı derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yedimde olup bin iki yüz altmış iki senesi Zilka‘de’ş-şerîfesi’nin on üçüncü günü tarihiyle müverraha ve ol târihde Dârü’l-hilâfeti’l-aliyye kādısı olan Kahvecibaşızade Mehmed Nurullah Efendi merhûmun imzâ ve hatemini hâviye işbu bir kıt‘a hüccet-i şer‘iyye ve kethüdâ-yı mûmâ-ileyhin takdîm eylediği bir kıt‘a ilmühaber mantûklarınca yedimde müstakillen mülk ve hakkım olmağla ben âlât-ı gedik-i mezkûru yüz yirmi sehm i‘tibâr edip elli sehm hisse-i şâyi‘asını yedimde bi’l-ibkā mâ‘adâ yetmiş sehm hisse-i şâyi‘asını sene-i sâbıka yani bin iki yüz yetmiş sekiz senesi Zilhicceti’ş-şerîfesinin yirmi yedinci günü merkūm Dimitri’ye bâ-hüccet-i şer‘iyye bey‘ ve teslîm etmişdim el-hâletü hâzihî ber-minvâl-i muharrer yedimde ibkā eylediğim elli sehm hisse-i şâyi‘a-i âlât-ı gedik-i mezkûru dahi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm diğer Dimitri’ye yedi bin guruşa bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yedi bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz eyledim ba‘de’l-yevm âlât-ı gedik-i mezkûrun elli sehm hisse-i şâyi‘a-i merkūmesinde dahi benim aslâ ve kat‘â alâka ve medhalim kalmayıp mecmû‘-ı âlât-ı gedik-i mezkûr merkūm Dimitri’nin mülk-i mahz ve hakk-ı sırfı olmağla mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 Safer sene 1279 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum