İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 150 Hüküm no: 85 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Feyzullah Ağa b. İbrahim’in tütüncü dükkânındaki hisselerini berber esnâfından Hüseyin Ağa b. Ahmed’e satması Tütüncü mübâya‘ası Üsküdar’da 12250 guruş. Sonradan tashîh olunmuşdur Kezâlik manav esnâfından Feyzullah Ağa b. İbrahim meclis-i şer‘-i şerîf-i lâzımü’t-teşrîfde medîne-i Üsküdar’da Aşçıbaşı mahallesinde sâkin işbu bâ‘isü’l-kitâb berber esnâfından Hüseyin Ağa b. Ahmed muvâcehesinde tütüncü esnâfı kethüdâsı el-Hâc Mehmed Latif Efendi tarafından mürsel esnâf-ı merkūmeden el-Hâc Ahmed Ağa b. Süleyman hâzır olduğu hâlde ikrâr-ı tâm ve takrîr-i kelâm edip medîne-i mezkûrede Kefçe Dede mahallesinde Kızlar Ağası Çeşmesi nâm mahalde bir tarafdan hallâc dükkânı ve bir tarafdan manav dükkânı ve bir tarafdan Kâtip Ahmed Efendi’nin muhterik menzil arsası ve taraf-ı râbi‘i tarîk-i âm ile mahdûd Valide-i Atik Câmi‘-i şerîfi Vakfı müsakkafâtından mezbûr Hüseyin Ağa’nın bâ-temessük-i mütevelli taht-ı tasarrufunda bulunan bir bâb tütüncü dükkânı derûnunda mevcûde beyne’l-esnâf tütüncü gediği ta‘bîr olunur Eshâm Muhâsebesi kaleminde es-Seyyid Mustafa Ağa ismine mukayyed bâ-defter-i müfredât âlât-ı lâzime-i ma‘lûmenin otuz iki sehm i‘tibârıyla dokuz sehm hisse-i şâyi‘ası Ümmügülsüm Hatun’un ve yirmi üç sehm hisse-i şâyi‘ası dahi yedimde olup bin iki yüz yetmiş beş senesi Cumâdelulasının onuncu günü tarihiyle müverraha ve ol târihde İstanbul kādısı bulunan sadr-ı Anadolu pâye-i refî‘asıyla mübâhî semâhatlü Mustafa Asım Efendi hazretlerinin imzâ ve hatemini hâviye işbu bir kıt‘a mübâya‘a hücceti nâtıka olduğu üzere benim yedimde mülk ve hakkım olmağla el-hâletü hâzihî ben ber-minvâl-i muharrer mâlik olduğum yirmi üç sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Hüseyin Ağa’ya bâ-ilmühaber ve şerîkem mezbûrenin izniyle on iki bin iki yüz elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl edip semeni olan meblağ-ı mezkûr on iki bin iki yüz elli guruşu bana tamâmen ve kâmilen def‘ u teslîm eylediğinde ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik, ba‘de’l-yevm âlât-ı gedik-i mezkûrun yirmi üç sehm hisse-i şâyi‘a-i mezkûresinde benim aslâ ve kat‘â alâka ve medhalim kalmayıp mezbûr Hüseyin Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî Gurre-i Muharrem sene 1279 Şuhûdü’l-hâl: Eş-şahidune’s-sabıkūn