İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 151 Hüküm no: 86 Orijinal metin no: [17b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbethâneci esnâfının Beyoğlu kolu ustabaşısı Andon v. Ohannes’in şerbethâne hisselerini Balıkçı Martıoğlu Bedros’a satması Şerbethâne mübâya‘ası 60000 guruş. Kaydı ihrâc şüd fî 27 Şevval sene [12]89 Kezâlik teba‘a-i Devlet-i aliyye’nin Ermeni milletinden şerbethâneci esnâfının Beyoğlu kolu ustabaşısı Andon v. Ohannes meclis-i şer‘-i şerîf-i hatîrde teba‘a-i Devlet-i aliyye’nin Ermeni milletinden olduğu bâ-ilmühaber mütehakkık olan bâ‘isü’r-rakīm Balıkçı Martıoğlu Bedros v. Hıristostor muvâcehesinde esnâf-ı merkūmenin Samatya kolu ustabaşısı Haci Delon? v. Yakut ve Beyoğlu kolu diğer ustabaşısı Nikola v. Apostol hâzır oldukları hâlde ikrâr-ı tâm ve takrîr-i kelâm edip mahrûse-i Galata hâricinde Beyoğlu civârında Ağa Câmi’i kurbünde Tarlabaşı nâm mahalde vâki‘ bir tarafdan Katolik milleti piskoposu husûsi menzili ve ba‘zen Ahmed Ağa menzili ve etrâf-ı selâsesi tarîk-i âm ile mahdûd merhûm Ruus Ahmed Ağa Vakfı müsakkafâtından benim bi’l-icâreteyn taht-ı tasarrufumda olan şehriye yüz yirmi guruş kirâlı Bağcı koltuğu demekle arîf bir bâb şerbethâne derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme yüz yirmi sehm i‘tibârıyla altmış sehm hisse-i şâyi‘ası âharların yedlerinde mülkleri olup mâ‘adâ altmış sehm hisse-i şâyi‘ası dahi akd-i âti’z-zikrin sudûruna değin yedimde olup bin iki yüz altmış beş senesi Muharremü’l-harâmının on yedinci günü târihiyle müverrah ve ol târihde rüsûm-i zecriye muhassılı olan es-Seyyid Yakub Paşa merhûmun mührüyle memhûr işbu bir kıt‘a sûret ve hâlâ Zecriye Nâzırı izzetlü Hüseyin Efendi’nin bir kıt‘a ilmühaberi mantûklarınca yedimde mülk ve hakkım olmağla ben âlât-ı gedik-i mezkûrdan ber-minvâl-i muharrer mâlik olduğum altmış sehm hisse-i şâyi‘a-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ altmış bin guruşa merkūm Bedros’a bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm altmış bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini ibrâ-yı sahîh-i şer‘î ile ibrâ vü ıskāt ve her birimiz ber-vech-i muharrer âharın ibrâsını kabûl eyledik ba‘de’l-yevm âlât-ı gedik-i mezkûrun altmış sehm hisse-i şâyi‘a-i merkūmesinde benim aslâ ve kat‘â alâka ve medhalim kalmayıp merkūm Bedros’un mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 6 Safer sene 1279 Şuhûdü’l-hâl: Muhzır Mehmed Ağa b. ( ), Muhzır Mustafa Ağa b. ( ), Muhzır el-Hâc Yusuf Ağa b. ( ), Muhzır Feyzullah Ağa b. ( ), ve gayruhum