İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 152 Hüküm no: 87 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hanım bt. Hacı Ömer Ağa’dan mirasçılarına kalan tütüncü mahzeni hisselerinin İsmail Ağa b. Mustafa’ya satılması Tütüncü mağazası 7656 guruş. Kaydı ihrâc şüd fî 25 M sene [1]236 Kezâlik mahmiye-i İstanbul’da Bozdoğan Kemeri kurbünde Molla Hüsrev mahallesinde sâkine iken bundan mukaddem vefât eden Zeyneb Hanım bt. el-müteveffâ tüccârdan el-Hâc Ömer Ağa b. Mustafa’nın verâseti zevc-i metrûku Hasan Efendi b. el-Hâc Ali ile vâlidesi Esma Hanım bt. Abdullah b. Abdurrahman ve zevc-i mezbûr Hasan Efendi’nin firâşından hâsıla sadriye sagīre kızı Fâtımatü’z-zehra ve li-ebeveyn er karındaşı sagīr Hüseyin Hüsnü’ye münhasıra olduğu lede’ş-şer‘i’l-enver zâhir ve mütehakkık oldukdan sonra mezbûr Hasan Efendi nefsinden bi’l-asâle ve kızı sagīre-i mezbûre Fâtımatü’z-zehra’nın pederi olmağla bi’l-velâye mezbûr Hüseyin Hüsnü’nün vâlidesi ve tesviye-i umûruna kıbel-i şer‘den mansûbe vasîsi ümm-i mezbûre Esma Hanım tarafından husûs-ı âti’l-beyânda ikrâra vekîl olduğu zâtını ârifân Kısmet-i Askerîye mahkemesi ketebesinden Hasan Tahsin Efendi b. Mustafa ve mahkeme-i mezkûre muhzırânı rüfekâsından Ali Ağa b. Mehmed şehâdetleriyle ber-nehc -i şer‘î sâbit olan el-Hâc Salih Efendi b. el-Hâc Hasan hâzır olduğu hâlde meclis-i şer‘-i şerîf-i münîrde mahmiye-i mezkûre mahkemesi muhzırânından İsmail Ağa b. Mustafa mahzarında tütüncü esnâfının kethüdası el-Hâc Mehmed Latif Efendi b. İsmail ile duhân tüccârından mazbûtü’l-esâmî on nefer müslim ve beş nefer hıristiyan taraflarından mürsel vekîlleri kethüdâ vekîli Ahmed Efendi b. Osman ve yazıcısı Ahmed Efendi b. el-Hâc Mehmed ve yiğitbaşısı Ahmed Ağa b. Mustafa hâzır oldukları hâlde her biri bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezkûrede Balık Pazarı kapısı dâhilinde Tahmis kurbunda Asmaaltı nâm mahalde Dörtyolağzı’nda vâki‘ bir tarafdan Ali Efendi’nin sabuncu mağazası ve bir tarafdan Osman Efendi’nin mağazası ve bir tarafdan şerbethâne ve taraf-ı râbi‘i tarîk-i âm ile mahdûd merhûm Rüstem Paşa Vakfı musakkafâtından İsmail Bey’in bi’l-icâreteyn taht-ı tasarrufunda olan şehriye on guruş kirâ-yı kadîmelü Eshâm Muhâsebesi kaleminde müteveffâ-yı mezbûr el-Hâc Ömer Ağa ismine mukayyed bir bâb kârgîr tütüncü mahzeni derûnunda mevcûde beyne’l-esnâf gedik ta‘bîr olunur âlât-ı lâzime-i ma‘lûme altmış dört sehm i‘tibârıyla dört sehmi müteveffâ-yı mezbûr el-Hâc Ömer Ağa’nın zevcesi müvekkile-i vasiyy-i mezbûre Esma Hanım’ın ve diğer dört sehmi müteveffâ-yı mezbûrun diğer zevcesi gāibe ani’l-meclis Âişetü’s-sıdıka Hanım bt. Abdülmennân’ın ve yedi sehmi müteveffâ-yı mezbûr el-Hâc Ömer Ağa’nın mezbûre Âişetü’s-sıdıka Hanım’dan mütevellide ve sulbiye kebîre kızı kezâlik gāibe ani’l-meclis Adviye Hanım’ın ve on dörder sehimden yirmi sekiz sehmi müteveffâ-yı mezbûr el-Hâc Ömer Ağa’nın mezbûre Âişetü’s-sıdıka Hanım’dan mütevellidler sulbî kebîr oğulları gāiban ani’l-meclis Ömer Bey ve Halid Bey’in ve on dört sehmi yine müteveffâ-yı mezbûr el-Hâc Ömer Ağa’nın müvekkile-i merkūme Esma Hanım’dan mütevellid sulbî sagīr oğlu mezbûr Hüseyin Hüsnü’nün ve yedi sehmi dahi müteveffâ-yı mezbûr el-Hâc Ömer Ağa’nın müvekkile-i vasiyy-i mezbûre Esma Hanım’dan mütevellide sulbîye kızı müteveffât-ı mezbûre Zeyneb Hanım’ın hayâtında bâ-sûret-i müteveffâ-yı mezbûr el-Hâc Ömer Ağa’dan mevrûs yedlerinde mülkleri iken mezbûre Zeyneb Hanım vefât etdikde âlât-ı gedik-i mezkûrdan ber-minvâl-i muharrer mâlike olduğu yedi sehm hisse-i şâyi‘a-i mezkûre benimle kızım sagīre-i mezbûre Fâtımatü’z-zehra ve vâlidesi müvekkile-i vasiyy-i mezbûre Esma Hanım’a ve li-ebeveyn er karındaşı sagīr-i mezbûr Hüseyin Hüsnü’ye mevrûs oldukdan sonra ben bi’l-asâle ve bi’l-velâye müvekkile-i vasiyy-i mezbûre Esma Hanım dahi kezâlik bi’l-asâle ve bi’l-vesâye âlât-ı gedik-i mezkûrdan ber-minvâl-i muharrer mâlik olduğumuz yedi sehm hisse-i şâyi‘amızı şehr-i sâbık Şevvali’l-mükerreminin yirmi dokuzuncu günü târihiyle müverrah hâlâ askerî kassâmı İstanbul pâye-i refî‘asıyla mübâhî Çarşambavîzâde fazîletlü es-Seyyid Mehmed Said Efendi hazretleriyle kethüdâ-yı mûmâ-ileyhin mührüyle memhûr işbu bir kıt‘a ilmühaber mantûkunca lede’l-müzâyede ve gıbbe inkıtâ‘ı’r-rağbe el-yevm semen-i misli idüğü esnâf-ı hâzırûn-ı merkūmûn ile sâir cerîdede mazbûtü’l-esâmî kimesnelerin alâ tarîki’ş-şehâde ihbârlarıyla zâhir ve mütehakkık olan yedi bin altı yüz elli altı guruşa mezbûr İsmail Ağa’ya tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile bâ-izn-i şürekâ bey‘ ve temlîk ve vech-i lâyıkıyla teslîm eylediğimizde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı merkūm yedi bin altı yüz elli altı guruşu tamâmen bize def‘ u teslîm biz dahi yedinden tamâmen bi’l-asâle ve bi’l-velâye ve bi’l-vesâye ahz u kabz ve müteveffâ-yı mezbûre Zeyneb Hanım’ın defter-i kassâmına idhâl eyledik ba‘de’l-yevm âlât-ı gedik-i mezkûrun ber i‘tibâr-ı merkūm yedi sehm hisse-i şâyi‘a-i merkūmesinde benimle sagīre-i mezbûre Fâtımatü’z-zehra ve müvekkile-i vasiyy-i mezbûre Esma Hanım’ın ve sagīr-i mezbûr Hüseyin Hüsnü’nün aslâ ve kat‘â alâka ve medhalimiz kalmayıp merkūm İsmail Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasadîki’ş-şer‘î mezbûr İsmail Ağa meclis-i şer‘-i enverde bâ‘isetü’l-kitâb mezbûre Esma Hanım tarafından husûs-ı âti’z-zikrde tasdîka vekîl-i şer‘îsi mezbûr el-Hâc Salih Efendi mahzarında ikrâr-ı tâm ve takrîr-i kelâm edip ben dahi âlât-ı gedik-i mezkûrdan ber i‘tibâr-ı merkūm ânifen şirâen mâlik olduğum yedi sehm hisse-i şâyi‘a-i merkūmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin ve bâ-izn-i şürekâ yedi bin altı yüz elli altı guruş semen-i medfû‘ ve makbûza müvekkile-i mezbûre Esma Hanım için vekîl-i mezbûr el-Hâc Salih Efendi’ye bey‘ ve temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl etmekle fîmâ-ba’d âlât-ı gedik-i mezkûrun ber i‘tibâr-ı merkūm yedi sehm hisse-i şâyi‘a-i merkūmesi müvekkile-i mezbûre Esma Hanım’ın mülk-i müşterâsı ve hakk-ı sırfı olup benim aslâ ve kat‘â alâka ve medhalim kalmamışdır dedikde gıbbe. Fî 8 Zilka‘de sene 1278 Şuhûdü’l-hâl: Muhzır Süleyman Ağa b. ( ), Muhzır Mustafa Ağa b. ( ), Muhzır Şakir Ağa b. ( ), Muhzır Feyzullah Ağa b. ( ), ve gayruhum