İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 347 Hüküm no: 378 Orijinal metin no: [147-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Silah altına alınan redif taburlarına mensup olarak Rumeli vilayetlerinde bulunan memurların hizmetlerinden ayrılmamaları Bâb-ı Âlî Dâire-i Sadâret-i Uzmâ Mektûbî Kalemi Aded: 113 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Silâh altına alınan redif taburlarına mensûb olup Rumeli vilâyât-ı şâhânesinde mevcûd ve müstahdem me’mûrînden hizmetlerinden infikâkleri câiz olmayanların nefer tahsîsâtıyla terki hakkındaki karâr her dâirece sû-i tefsîr edilerek bunların tahdîdi dahi mümkün olamadığından bahisle karâr-ı mezkûr hangi me’mûrlara şâmil olacağının ta‘yîni hakkında bazı ifâdeyi hâvî taraf-ı vâlâ-yı ser-askerîden mürsel tezkire ve evrâk-ı müteferri‘a üzerine Şûrâ-yı Devlet Tanzîmât Dâiresi’nden kaleme alınıp Meclis-i Mahsûs-ı Vükelâ’da mütâla‘a olunan mazbatada beyân olunduğu vechile müddet-i mukaddese-i askeriyenin ehliyet-i azîmesi derkâr olup Ahz-ı Asker Kānûnnâme-i Hümâyûn’unda ta‘yîn olunanlardan mâ‘adâsının istisnâları câiz olamayacağından ve şâyed bazı esbâb-ı mühimmeye binâen bir me’mûrun vazîfesi başından alınması lâzım geldiği hâlde bi’l-istîzân şeref-müte‘allik buyrulacak irâde-i seniyye-i hazret-i pâdişâhî hükm-i münîfine tevfîkan hizmetinde ibkāsı îcâb edeceğinden ona göre îfâsı mu‘âmele olunmak için ser-asker-i müşârün-ileyhe ve devâire teblîgāt icrâsı tezekkür ve tensîb kılınarak mûcebince teblîgāt îfâ edilmiş olmağla Bâb-ı Vâlâ-yı Meşîhat-penâhîlerince de ber-vech-i muharrer îfâ-yı mu‘âmeleye himmet buyurulması bâbında emr u irâde hazret-i men-lehu’l-emrindir. Fî 14 Şa‘bân sene 322, fî 10 Teşrîn-i evvel sene 320 Sadrıa‘zam Ferid