İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 361 Hüküm no: 394 Orijinal metin no: [154-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzzet Paşa’nın emlak, emval ve arazisiyle ilgili tüm işlemleri yapmak üzere Viram Efendi ile Abdurrahman Bey’e vekalet vermesi Bâb-ı Âlî Dâire-i Sadâret-i Uzmâ Mektûbî Kalemi Aded: 120 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Londra Mukāvelât Muharrirliği nezdinde tanzîm edilip Londra Başşehbenderliği’nin 14 ve 20 ve 21 Teşrîn-i evvel sene 908 târihli tasdîkini hâvî ve İzzet Paşa’nın bi’l-cümle emlâk ve emvâl ve arâzîsinin idâre ve bedel-i îcârlarını ahz u kabz ve matlûbâtının istifâsına ve ale’d-derecât bi’l-cümle mehâkimde müdde‘î ve müdde‘â-aleyh sıfâtıyla bulunmağa ve hacz vaz‘ ve fekkine ve sâireye vekâlet-i âmme-i mutlaka ile me’zûn olmak üzere biri Viram Şebehoh? Efendi’yi ve diğeri mahdûmu Abdurrahman Bey’i tevkîl eylediğine dâir iki ve aynı meâlde kezâlik Viram Şebehoh? Efendi’yi vekâlet-i âmme-i mutlaka ile tevkîl ettiğini mutazammın paşa-yı mûmâ-ileyhin ve diğer mahdûmu Washington sefîr-i sâbıkı Mehmed Ali Bey’in imzâsını muhtevî olup li-ecli’t-tasdîk ibrâz edilen üç kıt‘a vekâletnâmenin fî 23 Teşrîn-i evvel sene 324 târihinde tasdîk kılındığı Umûr-ı Hukūkiye-i Muhtalita Kalemi’nin ifâdesine atfen Hâriciye Nezâret-i celîlesinden bâ-tezkire inbâ olunmuş ise de bu vekâletnâmelerle vukū‘ bulacak mürâca‘at üzerine bir gûne mu‘âmeleye meydân verilmemesi zımnında devâir-i lâzımeye ve Suriye ve Beyrut vilâyetine teblîgāt icrâ kılınmış olmağla dâire-i celîle-i meşîhatce de ber-vech-i muharrer îfâ-yı muktezâsı bâbında emr u irâde hazret-i men-lehu’l-emrindir. Fî 23 Şevval sene 326, fî 5 Teşrîn-i sânî sene 324. Sadrıa‘zam Kâmil