Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 72 Hüküm no: 36 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümayun için toplanan ve satın alınan ihtiyaç fazlası unun Adalar ve Taşköprü hakkına dağıtılması Kıdvetü’n-nüvvâbi’l-müteşerri‘în Üsküdar kazâsında bi’l-fi‘il nâibü’ş-şer‘ olan Mevlânâ ( ) -zîde ilmuhû- ve mefâhirü’l-emâsil ve’l-akrân kethüdâ yerleri ve yeniçeri serdârı ve a‘yân-ı vilâyetin iş erleri ve Yakacık voyvodası ve Kızılada ve Kartal subaşıları ve mâlikâne mutasarrıfı -zîde kadruhum- tevkī‘-i refî‘-i hümâyûn vâsıl olıcak ma‘lûm ola ki, bundan akdem sefer-i hümâyûnum içün mübâya‘a ve cem‘ olunan dakīkin bi-lütfillâhi te‘âlâ şevâgil-i seferiye ber-taraf olup iktizâsı olmadığından Âsitâne-i sa‘âdetimde dahi icâleten sürülmesi mümkün olmayıp tûl meks ile eyyâm-ı dîkda dakīkin bozulup itlâf olmasın mukarrer ve zarâr-ı mîrîye râci‘ olmağla kazâ-i mezkûra tâbi‘ Adalar nâhiye[sine] iki bin beş yüz kîle ve Taşköprü nâhiyesine tâbi‘ Beşdivan’a üç kîle dakīk tevzî‘ ve beher kîle ellişer akçe olmak üzere bundan altı ay mürûruna değin lâzım gelen bahâları tedrîc ile edâ olundukda re‘âyâ fukarâsına dahi ehven ve evlâ olmağla imdi sen ki mevlânâ-yı mûmâ-ileyhsin, zikr olunan dakīki voyvoda ve subaşılar ve mâlikâne mutasarrıf ve a‘yân-ı vilâyet ma‘rifetleri ile ve ma‘rifet-i şer‘le mîrî kantarı ile vezn ve teslîm ve tevzî‘ ve makbûzlarına hüccet-i şer‘iye etdirip memhûr temessükleri ile mahâlline kayd olunmak içün Dersa‘âdet’ime arz ü i‘lâm eylemek bâbında fermân-ı âlîşânım sâdır olmuşdur. Buyurdum ki, hükm-i şerîfimle ( ) vardıkda bu bâbda sâdır olan emrim üzere amel edip dahi sen ki mûmâ-ileyhsin, zikr olunan dakīki voyvoda ve subaşılar ve mâlikâne mutasarrıf ve a‘yân-ı vilâyet ma‘rifetleri ile ve ma‘rifet-i şer‘le mîrî kantarı ile vezn ve teslîm ve tevzî‘ ve makbûzlarına hüccet-i şer‘iye etdirdip memhûr temessükleri ile mahâlline kayd olunmak içün Dersa‘âdet’ime arz ü i‘lâm eyleyesin, alâmet-i şerîfime i‘timâd kılasın. Hurrire fi’l-yevmi’l-hâmis ve’l-ışrîn min-Rebî‘i’l-âhir li-sene erba‘a ve ( ) ve mi'e ve elf. Kostantıniyye el-mahrûse.