Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 113 Hüküm no: 108 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Todoş'un evini Hıristo'ya satması Kartal’da Hıristo’nun mülknâmesidir. Medîne-i Üsküdar muzâfâtından Adalar nâhiyesine tâbi‘ Kartal nâm karye sükkânından Todoş v. Danyel nâm zimmî meclis-i şer‘-i şerîfde işbu râfi‘u’s-sifr Hıristo v. Görgo nâm zimmî muvâcehesinde bi-tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Aci Tanaş nâm zimmî mülkü ve bir tarafdan Papa İstavronos nâm zimmî mülkü ve bir tarafdan Lanbortos nâm zimmî mülkü ve bir tarafdan tarîk-i âm ile mahdûd bir bâb tahtânî oda ve bir sofayı müştemil mülk menzilimi tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile mezbûr Hıristo’ya altmış kıt‘a esedî guruşa bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr altmış kıt‘a esedî guruşu müşteri-i mezbûr yedinden tamâmen ahz u kabz eyledim, ba‘de’l-yevm menzil-i mahdûd-ı mezkûrda benim kat‘â alâka ve medhalim kalmadı, müşteri-i mezbûr[un] mülk-i müşterâsı ve hakk-ı sırfıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-mürecceb li-sene ışrîn ve mi'e ve elf. Şuhûdü’l-hâl: Ebubekir Beşe [b.] Halil, Mustafa Çelebi [b.] Mehmed Çavuşzâde, Mehmed Beşe [b.] Musli, Mustafa Beşe [b.] Mehmed, İbrahim Beşe [b.] Mehmed Berber, Mehmed Efendi [b.] Mustafa.