Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 148 Hüküm no: 188 Orijinal metin no: [35b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis'in Adalar nahiyesindeki evi ile iki dükkânını yıkan Bayramoğlu, Adalıoğlu, Karayani ve Pandeli'nin muhakemeleri emri Kıdvetü’n-nüvvâb ve’l-müteşerri‘în Adalar nâhiyesinde nâibü’ş-şer‘i’ş-şerîf olan Mevlânâ -zîde ilmuhû- tevkī‘-i refî‘-i hümâyûn vâsıl olıcak ma‘lûm ola ki, dârende-i fermân-ı hümâyûn Avanis nâm zimmî südde-i sa‘âdetime arzuhâl edip nâhiye-i mezbûrda vâki‘ mutasarrıf olduğu mülk menzili ve iki dükkâneyn, yine nâhiye-i mezbûr sâkinlerinden Bayramoğlu ve Adalıoğlu ve Karayani ve Pandeli nâm zimmîler birbiri ile yek-dîl ve bin yüz on ( ) senesinde fuzûlî hedm ve nakzı istihlâk etmekle ziyâde gadr ve ta‘addî eyledikleri ve bundan akdem bir def‘a dahi emr-i şerîfim ısdâr etmekle icrâ-yı hak olunmadığı ve bu bâbda da‘vâsına muvâfık şeyhülislâmdan fetvâ-yı şerîfe verildiğin bildirip fetvâ-yı şerîfesi mûcebince amel olunup icrâ-yı şer‘ ve ihkāk-ı hak olunmak bâbında hükm-i hümâyûnum ricâ eylediği ecilden buyurdum ki hükm-i şerîfimle vardıkda mezbûrları müstakıllen meclis-i şer‘-i şerîfe ihzâr ve bunun ile beraber edip mukaddemâ bir def‘a şer‘le görülüp fasl olunmayan da‘vâlarını tamâm hak ve adl üzere tefahhus ve yedinde olan fetvâ-yı şerîfe nazar edip göresin, i‘lâm olunduğu üzere ise ol bâbda muktezâ-yı şer‘-i kavîme ve da‘vâsına muvâfık fetvâ-yı şerîfe mûcebince amel edip dahi ba‘de’s-sübût ber-mûceb-i fetvâ-yı şerîfe icrâ-yı şer‘ ve ihkāk eyleyesin, min-ba‘d şer‘-i şerîfe ve fetvâ-yı münîfe ve mukaddemâ ve hâlâ verilen emr-i hümâyûnuma muhâlif kimesneye iş etdirmeyesiz, hak üzere olup kaziyyede alâkası ve medhali olmayanı bunun da‘vâsına karışdırmayıp eslemeyip ta‘allül ve inâd üzere olup kaziyyede alâka ve medhali olmayanı bunun da‘vâsına karışdırmayıp eslemeyip ta‘allül ve inâd üzere olanları ism [ü] resm ile vukū‘u üzere yazıp Âsitâne-i sa‘âdetime arz u i‘lâm edip bu husûs içün tekrâr bir dahi emrim irsâline muhtâc etmeyesiz, şöyle bilesiz, alâmet-i şerîfe i‘timâd kılasız. Tahrîren fî-evâhiri şehri Rebî‘i’l-evvel sene selâse ve ışrîn ve mi'e ve elf. Be-makām-ı Kostantıniyye.