Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 152 Hüküm no: 198 Orijinal metin no: [36b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal nahiyesi yeniçeri serdarlığına yirmi ikinci bölükten Mehmed'in tayini Kıdvetü’n-nüvvâbi’l-müteşerri‘în Üsküdar muzâfâtından Kartal nâhiyesinde hâkimü’ş-şer‘ olan efendi -zîde ilmuhû- tahiyyât-ı sâfiyât ithâfından sonra inhâ olunan budur ki, taht-ı hükûmetinizde vâki‘ Dergâh-ı âlî yeniçeri serdârlığı yirmi iki bölüğün Mehmed nâm yoldaş her vechile mahâll ve müstahak ve Kartal kasabası memerr-i nâs olmağın bir serdârın lüzûmu olunduğun tarafımıza i‘lâm eylemeleriyle merkūmu nâhiye-i merkūma serdâr nasb ü ta‘yîn olunmağın işbu mektûb tahrîr ve irsâl kılındı, vusûlünde gerekdir ki merkūmu ol tarafda yeniçeri ve cebeci ve topçu ve toparabacısı ve kuloğulları ve gılmân-ı acemiyân ve sekbân-ı süvârî üzerlerine zâbit ve serdâr bilip sözünden taşra ve re'yinden hâric vaz‘ u hareket eylemeyip cümlesi itâ‘at ve inkıyâd üzere olalar ve tavâif-i merkūmûndan bilâ-vâris fevt olanların muhallefâtı ve metrûkâtları bi-hasebi’ş-şer‘ ve’l-kānûn merkūma zabt etdirip ma‘rifet-i şer‘le tahrîr-i defter ve sûk-ı sultânîde fürûht ve hâsıl olan nükūdu müfredât defterleriyle cânib-i beytülmâla irsâl [ve] îsâl edip hilâf-ı şer‘-i şerîf kimesneye rencîde ve remîde etdirmeyip mûceb-i mektûb ile âmil olasız. Tahrîren fî-evâsıtı şehri Rebî‘i’l-âhir sene selâse ve ışrîn ve mi'e ve elf. İsmail Kāimmakām-ı Dergâh-ı âlî hâlâ.