Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 154 Hüküm no: 208 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal halkından Emetullah Hatun'a vekâlaten kocası Mahmud'un Yunus b. Mustafa aleyhine açtığı bağ ve hibe davasından men edilmesi Medîne-i Üsküdar muzâfâtından Adalar nâhiyesine tâbi‘ Kartal sâkinlerinden zâtı vech-i şer‘î üzere mu‘arrefe olan zevcesi Emetullah tarafından vekâlet[i] sâbit olan Mahmud b. Mehmed nâm kimesne meclis-i şer‘-i şerîf ve mahfil-i dîn-i münîfde yine karye-i mezbûre sâkinlerinden Yunus b. Mustafa üzerine da‘vâ ve takrîr-i kelâm edip bundan akdem müteveffâ olan Râbia Hatun zevcem müvekkilem Emetullah nâm hatuna Rahman toprağı demekle meşhûr ma‘lûmü’l-hudûd olan on bin kütük bağı hâl-i hayatında ve kemâl-i akl-ı sıhhatinde hibe ve temlîk eyledi, el-hâletü hâzihî Yusuf b. Abdullah ve Ali b. Derviş şehâdeti ile vekâletim sâbit olduğu hasebiyle taleb ve da‘vâ ederim dedikde gıbbe’s-suâl Yunus mezkûr cevâbında fi’l-hakīka Emetullah Hatun târîh-i kitâbdan sekiz sene mukaddem hâletesi Râbia Hatun’dan hibe da‘vâsı etdikde karye-i mezkûre toprağında ma‘lûmü’l-hudûd altmış guruş kıymetli bir bağçeye sulh ve ibrâ oldu ve ba‘dehu Râbia bağ-ı mezkûru karındaşım İbrahim Bey’e yüz on guruşa bey‘ ve teslîm eyledi, yedim yed-i emânetdir dedikde mezbûr Yunus’un sıdk-ı kelâmını mübeyyin beyyine taleb olundukda udûl-ı ricâl-i Müslimînden el-Hâc Mehmed b. Yakub ve el-Hâc Ali ve Hüseyin Beşe nâm kimesneler li-ecli’ş-şehâde her biri meclis-i şer‘a hâzırân olup istişhâd olunduklarında her birileri bizim huzûrumuzda bağ ve sâir muhallefâtdan hibe da‘vâsından Emetullah Hatun müteveffâ olan hâletesi Râbia Hatun ile altmış guruş kıymetli ma‘lûmü’l-hudûd bir bağçeye sulh ve bedel-i sulh olan mezkûr bağçeyi mezbûre Emetullah kabz eyledikden sonra sâlifü’z-zikr olan bağı Râbia Hatun İbrahim Bey’e yüz on guruşa bey‘ eyledi deyü şehâdet etdikden sonra şehâdetleri hayyiz-i kabûlde vâkı‘a oldukda müdde‘î-i mezkûr Mahmud da‘vâsından men‘ birle mâ-hüve’l-vâki‘ bi’t-taleb ketb olundu. Hurrire fî-şehri Rebî‘i’l-evvel sene selâse ve ışrîn ve mi'e ve elf. Şuhûdü’l-hâl: Mehmed Beşe b. Ahmed Odabaşı, Hüseyin b. Mehmed, Mehmed b. Hasan, Mehmed b. Ali, Mehmed Ağa Zâbit-i Kartal, el-Hâc Ahmed b. Halil, Bekir Beşe b. Halil, Mehmed Beşe Serdâr.