Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 161 Hüküm no: 230 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakacık köyünden vefat eden Veli Bey'in terekesinden küçük çocukları İbrahim ve Halil'e nafaka tayini Medîne-i Üsküdar’a muzâfe Adalar nâhiyesine tâbi‘ karye-i Yakacık’da sâkin iken bundan akdem vefât eden Veli Bey nâm müteveffânın sagīr oğulları İbrahim ve Halil’in üveyi babaları Mustafa b. Mahmud nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip sagīrân-ı mezbûrânın babaları müteveffâ-yı mezbûrdan irs-i şer‘le intikāl eden mâllarından nafaka ve kisve ve sâir mühimmât-ı lâzımesi içün yevmî her birine beşer akçe takdîr olunmak taleb ederim dedikde hâkim-i muvakkı‘-ı müstetâb vech-i meşrûh üzere sagīrân-ı mezbûrâna babaları müteveffâ-yı mezbûrdan intikāl eden mallarından nafaka ve kisveleri ve sâir harc-ı lâzımeleri içün târîh-i kitâbdan yevmî her birine beşer akçe nafaka takdîr olunup inde’l-ihtiyâc istidâneye ve vakt-i zaferde rücû‘a izin verilmeğin mâ-hüve’l-vâki‘ bi’t-taleb ketb olundu. Hurrire fî-gurreti Ramazani’l-mübârek li-sene ışrîn ve mi'e ve elf. Şuhûdü’l-hâl: İmâm Mehmed Efendi, Halil Beşe, Davud Bey, Receb Beşe, İbrahim Beşe, Mustafa Beşe, Ahmed Beşe, Ali Beşe, Hüseyin Beşe ve gayruhum mine’l-huzzâr.