Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 161 Hüküm no: 231 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal halkından vefat eden Süleyman'ın terekesinden beytülmala kalan ev hissesinin hanımı Saliha'ya satılması Medîne-i Üsküdar’a muzâfe Adalar nâhiyesine tâbi‘ Kartal’da sâkin iken bundan akdem fevt olan Süleyman nâm müteveffânın verâseti zevce-i metrûkesi Saliha bt. Hüseyin nâm hatuna münhasıra olup gayri vâris-i ma‘rûfu olmamağla rub‘u mezbûre Saliha Hatun’a ve sülüs beytülmâl-i hâssaya âid ve râci‘ olduğu mâlından karye-i mezbûrede bi’l-fi‘il hâssa beytülmâlcı olup vech-i meşrûh üzere mezbûrun muhallefâtına vâzı‘u’l-yed olan karye-i mezbûre zâbiti Himmet Bey meclis-i şer‘-i hatîr-i lâzımü’t-tevkīrde işbu bâ‘isü hâzihi’l-vesîka merkūme Saliha Hatun mahzarında takrîr-i kelâm edip müteveffâ-yı mezbûr Süleyman’ın cümle muhallefâtından olup karye-i mezbûrede vâki‘ bir tarafdan Kasab Ömer mülkü ve bir tarafdan el-Hâc Ali mülkü ve bir tarafdan Süleyman Bey mülkü ve bir tarafdan tarîk-i âm ile mahdûd bir bâb oda ve bir mikdâr bağçe ve kenîfi müştemil mülk menzilin nısf hisse-i şâyi‘asını cemî‘ tevâbi‘ ve levâhıkı ile sûk-ı sultânîde kirâren ve mirâren müzâyede olunup ragabât-ı nâs bi’l-külliye munkatı‘a oldukdan sonra iki bin yüz altmış akçede merkūme Saliha Hatun üzerinde karâr edip ziyâde [ile] tâlib-i âhar zuhûr etmemeğin menzil-i mezbûrun nısf hisse-i şâyi‘asını meblağ-ı merkūm iki bin yüz altmış akçeye bey‘-i bâtt-ı kat‘î ile merkūme Saliha Hatun’a bey‘ ve teslîm ol dahi minvâl-i muharrer üzere iştirâ ve tesellüm ve kabz eyledikden sonra semeni olan meblağ-ı merkūm iki bin yüz altmış akçeyi merkūme Saliha Hatun yedinden bi’l-emâne ahz u kabz eyledim, ba‘de’l-yevm menzil-i mezbûrun nısf hisse-i şâyi‘ası merkūme Saliha Hatun’un mülkü olup keyfe mâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: el-Hâc Yusuf, Halil Ağa, Ebubekir Beşe, İbrahim Beşe, Mehmed Beşe, Mustafa Çelebi, Mehmed Çelebi, Ömer Beşe, Hüseyin Çelebi.