Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 162 Hüküm no: 232 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakacık köyünden Ali'nin bağını Hanefi Beşe'ye satması Medîne-i Üsküdar’a muzâfe Adalar nâhiyesine tâbi‘ karye-i Yakacık’da sâkin Ali b. Mustafa nâm kimesne meclis-i şer‘-i hatîr-i lâzımü’t-tevkīrde işbu hâfizü hâze’l-kitâb Hanefi Beşe b. Murad mahzarında ikrâr-ı tâm ve takrîr-i kelâm edip karye-i mezbûre hudûdunda ze‘âmet toprağında vâki‘ bir tarafdan müşteri Hanefi Beşe bağı ve bir tarafdan Topal Mustafa bağı ve bir tarafdan Hüseyin bağı ve bir tarafdan tarîk-i âm ile mahdûd tahmînen iki bin çubuk mülk hora bağımı mezbûr Hanefi Beşe’ye bin dokuz yüz akçeye bey‘-i bâtt-ı kat‘î ile mezbûr Hanefi Beşe’ye bey‘ ve teslîm ve kabz-ı semen eyledikden sonra ol dahi minvâl-i muharrer üzere iştirâ ve tesellüm eyledikde semeni olan meblağ-ı merkūm bin dokuz yüz akçeyi mezbûr Hanefi Beşe yedinden bi’t-tamâm ahz a kabz eyledim, ba‘de’l-yevm bağ-ı mahdûd-ı mezkûr mezbûrun mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: Halil Beşe, İbrahim, Halil Ağa Zâbit-i Pendik, İmâm Mehmed Halîfe karye-i Yayalar, Ali Beşe b. Hızır, Ahmed Beşe, İsmail Beşe b. Mustafa.