Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 164 Hüküm no: 237 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Anaştaş'ın kardeşi Luka ile ortak olduğu evdeki hissesini kardeşine satması Medîne-i Üsküdar’a muzâfe Adalar nâhiyesine tâbi‘ Kartal nâm karye sâkinlerinden Anaştas v. Yorgaki nâm zimmî meclis-i şer‘-i şerîf-i enverde li-ebeveyn er karındaşı işbu bâ‘isü’s-sifr Luka nâm zimmî muvâcehesinde bi-tav‘ihî ikrâr ve takrîr-i kelâm edip akd-i âti’z-zikrin sudûruna değin karındaşım mesfûr Luka ile ale’l-iştirâki’s-seviyy silk-i mülkümüzde münselik olup karye-i mezbûrede vâki‘ etrâf-ı erba‘ası Terzi Yorgi ve diğer Yorgi ve Dimitraki mülkleri ve tarîk-i âm ile mahdûd iki bâb fevkānî oda ve üç bâb tahtânî oda ve sofa ve dehlîz ve bir mahzen ve bir mikdâr havluyu ve bi'r-i mâi ve bağçeyi müştemil bir kıt‘a mülk menzilde olan nısf hisse-i şâyi‘amı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile üç yüz altmış guruşa karındaşım mesfûr Luka’ya bey‘ ve teslîm ol dahi ber-vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr üç yüz altmış guruşu karındaşım müşteri-i merkūm Luka yedinden tamâmen ahz u kabz eyledim, min-ba‘d sâlifü’z-zikr menzilde olan nısf hisse-i şâyi‘ada benim kat‘â alâka ve medhalim kalmadı, karındaşım müşteri-i mersûmun mülk-i müşterâsı ve hakk-ı sırfıdır, keyfe mâ teşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilka‘deti’ş-şerîfe li-sene hamse ve selâsîn ve mi'e ve elf. Şuhûdü’l-hâl: İsmail Efendi b. Mehmed Efendi, Mehmed Ağa b. el-Hâc Hüseyin, Mehmed Beşe b. Hasan, Mustafa Beşe b. Mehmed, diğer Mehmed Beşe b. el-Hâc Ömer, Mehmed Çelebi b. Ali, İsmail Çelebi b. Şahin, Malamata v. Dimitraki, Pandali v. Deyyani, diğer Pandali v. Tarandafil.