Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 166 Hüküm no: 239 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avarızhane ve nüzûlhanelerden alınan vergiler hakkında eksik kayıt (...) ol mikdâr avâ[rı]z ve nüzûlhâneleri olup târîh-i mezbûra mahsûb olmak üzere her bir hânelerinden dört yüz yirmi dokuz akçe avârız ve altışar yüz akçe bedel-i nüzûllerin ve kırk buçuk ve bir rub‘ hânelerinden üçer yüz yirmi beşer akçe avârız ve altışar yüz akçe bedel-i nüzûllerin ve iki yü[z] altmış üç buçuk guruş ve bir rub‘ diğrenciyân ve tırpancıyân maktû‘ları irsâl olunan mühürlü ve nişânlı mevkūfât defteri mûcebince cem‘ ü tahsîl etdirdip hilâf-ı emr ve defter kimesneye inâd ve muhâlefet etdirmeyesin ve bundan mâ‘adâ mübâşir-i mezbûrun cihet-i ma‘âşı içün her bir avârızhânelerinden altışar akçe ve nüzûlhânelerinden otuz akçe dahi aldırıp bundan ziyâde aldırmayasın ve hîn-i tahsîlde avârız içün alınan her yüz on sekiz akçesinden bir esedî guruş ve nüzûl içün alınan her yüz on akçesinden bir esedî guruş alınıp ve eşrefî cedîd ve frengî altın iki buçuk guruşa ve hâlisü’l-ayâr pârenin kırkı bir guruşa aldırılıp bundan ziyâde ve noksâna alınmaya ve aldırmayasın, kesr-i defterden ve nakz-ı hâneden ve fermânımdan ziyâde taleb[iyle] rencîde ve remîde etdirmeye[siz], şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâbi‘ ve’l-ışrîn min-şehri Zilhicce li-sene seb‘a ve ışrîn ve mi'e ve elf. Sûret-i mevkūfât defteri kurâ-i medîne-i Üsküdar’a tâbi‘ diğrenciyân ve tırpancıyân. Ber-vech-i maktû‘; 24.450 meblağ Aded-i avârız ve nüzûlleri; 90 [guruş] 20 [guruş] 3,5 [akçe] 1 rub‘ Kad vasale ileynâ fî 3 Saferi’l-hayr sene [1]128