Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 167 Hüküm no: 241 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kavaklı köyü halkının kereste kesim ve naklinden muaf oldukları Sûret-i emr-i âlî bi-karyeti Kartal ve Pendik ve Kavaklı. Kıdvetü’n-nüvvâb ve’l-müteşerri‘în Üsküdar kazâsına tâbi‘ Adalar nâhiyesi nâibi Mevlânâ ( ) Efendi -zîde ilmuhû- tevkī‘-i refî‘-i hümâyûn vâsıl olıcak ma‘lûm ola ki, nâhiye-i mezbûra tâbi‘ Kartal ve Pendik karyeleri mülhakātından Kavaklı nâm [karye] ahâlîsi Dersa‘âdet’ime arzuhâl edip karyemiz kereste olan mahâlli ba‘îd olduğundan bundan akdem hâllerimize merhamet ve ahvâlimize şefkat olunup bi’l-külliye nakilden ve kat‘ı talebinden afv ve in‘âm ve yedimize emr-i şerîf verilip ve sâir üzerimize edâsı lâzım gelen tekâlîfimizi edâ eder iken hâlâ bu def‘a kereste kat‘ ve nakline memûr hasekiler celb-i mâl sevdâsıyla iskeleye mesâfe olan karyemize yirmi aded preçol-ı kebîr tahmîl ve perîşân olmamıza bâ‘is olmağla yedimizde olan emr-i şerîf mûcebince yine fîmâ-ba‘d dahi preçol ve sâir kereste kat‘ ve nakli bahânesiyle hasekiler ve sâirleri tarafından rencîde ve remîde olunmamak üzere emr-i şerîfim ricâ eyledikleri ecilden Hazîne-i âmire’de mahfûz olan Mevkūfât defterlerine nazar olundukda nâhiye-i mezbûra tâbi‘ Kartal ve Pendik ve Kavaklı karyelerine bu sene kat‘ı fermân olunan kalyon kerestesi tevzî‘ine dâhil olmadığı derkenâr olunmağın karye-i mezbûreler bu def‘a fermân olunan kereste tevzî‘ine dâhil olmadığı derkenâr olmağın derkenârı mûcebince müdâhale olunmaya deyü fermân olmuşdur, buyurdum ki hükm-i şerîfimle vardıkda bu bâbda sâdır olan emrim üzere amel edip dahi karye-i mezbûre bu def‘a fermân olan kereste tevzî‘ine dâhil olmamağla kereste talebiyle karye-i mezbûre ahâlîsin rencîde ve remîde etdirmeyip husûs-ı mezbûr içün bir dahi emrim varmalı eylemeyesin, şöyle bilesin, alâmet-i şerîfime i‘timâd kılasın. Tahrîren fi’l-yevmi’r-râbi‘ aşer min-şehri Zilhicce sene sitte ve ışrîn ve mi'e ve elf. Be-makām-ı Kostantıniyye