Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 168 Hüküm no: 242 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeğen Mustafa'nın Kartal'daki binası mülk olan harabe evinin enkazını almak istemesi Mevkūfât İzzetlü bostancıbaşı ağa ma‘rifetiyle Üsküdar nâibi efendi tarafından bir müstakīmü’l-kavl mütevellî ta‘yîn ve mahâll-i nizâ‘ın üzerinde husemâ muvâcehesinde şer‘le tefahhus ve vakfa muzır olmamak vech üzere görüp i‘lâm eyleyesin deyü buyuruldu. Devletlü sa‘âdetlü sultanım hazretleri sağ olsun. Üsküdar kazâsına tâbi‘ Kartal kasaba[sın]da yedimde olan sened-i meşrû‘a mûcebince binâsı mülk olan bir bâb kebîr hâne mürûr-ı eyyâmla harâba müşrif olup hedm olan enkāzını bir tarafdan ahâlî-i kasaba izâ‘at [ve] itlâf edip gadr-ı küllî olunmağla tarafımdan hedm murâd eylediğimde kasaba-i mezbûr ahâlîsinden bazıları biz bu hâne[yi] hedm etdirmeziz deyü hilâf-ı şer‘ müdâhale eylemeleriyle merâhim-i aliyyelerinden mercûdur ki Üsküdar nâibi efendi tarafından bir ehl-i hak mütevellî ta‘yîn buyurulup izzetlü bostancıbaşı ağa mübâşeretiyle ta‘addî ve müdâhaleleri men‘ u def‘ olunmak bâbında fermân-ı âlîleri ricâ olunur, bâkī fermân devletlü sultanım hazretlerinindir. Mine’l-fakīr Yeğen Mustafa