Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 168 Hüküm no: 243 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyünden Hıristo ve Rako'nun annelerinden miras kalan evlerini Nikola'ya satmaları Medîne-i Üsküdar’a muzâfe Adalar nâhiyesine tâbi‘ Pendik karyesi sâkinelerinden Hıristo ve Rako veledeyn-i Todori Nasrâniyeler taraflarından bey‘-i âti’l-beyâna Ali Beşe b. Hasan ve Hüseyin Beşe b. Şaban nâm kimesneler şehâdetleriyle vekâleti sâbite olan babaları Todori zimmî meclis-i şer‘-i hatîr-i lâzımü’t-tevkīrde işbu bâ‘isü hâze’s-sifr Nikola zimmî mahzarında bi’l-vekâle ikrâr ve takrîr-i kelâm edip müvekkillerim mesfûrânın silk-i mülklerinde karye-i mezbûrede vâki‘ bir tarafdan Polohori zimmî menzili ve bir tarafdan İstiko zimmî menzili ve bir tarafdan mesfûr Nikola zimmî menzili ve bir tarafdan tarîk-i âm ile mahdûd bir bâb fevkānî ve bir bâb tahtânî odayı müştemil vâlidelerinden intikāl eden menzil ki bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile mesfûr Nikola zimmîye bi’l-vekâle otuz guruşa bey‘ ve teslîm ve kabz-ı semen eyledikden sonra ol dahi minvâl-i muharrer üzere iştirâ ve tesellüm ve kabz eyledikde semeni olan meblağ-ı merkūm otuz guruşu müvekkilelerim içün bi’l-vekâle mesfûr Nikola zimmîden ahz u kabz eyledim, ba‘de’l-yevm menzil-i mahdûd-ı mezkûr mesfûr Nikola zimmînin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min-Şevvâli’l-mükerrem li-sene ışrîn ve mi'e ve elf. Şuhûdü’l-hâl: Halil Ağa, Hüseyin Beşe, Ali Beşe, Ahmed Beşe, Uzun Kosta, Malamat Anderye ve gayruhum mine’l-huzzâr.