Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 170 Hüküm no: 245 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyünden Aleksandırı ile annesi Praşkova'nın mülk bağlarını borçlarına karşılık olmak üzere Mosiko'ya satmaları Medîne-i Üsküdar’a muzâfe Adalar nâhiyesine tâbi‘ Pendik karye sükkânından Aleksandırı v. Kostantin vâlidesi Praşkova Nasrâniye ile meclis-i şer‘iye[de] işbu bâ‘isü hâze’s-sifr yine karye-i mezbûr sükkânından Mosiko v. Vilator mahzarında her biri ikrâr-ı tâm ve takrîr-i kelâm edip karye-i mezbûr toprağında vâki‘ bir tarafında İyosoma Ebser zimmî ve ( ) ve ( ) ve Mahmud tahmînen iki çubuk kış bağımızı ve yine karye-i mezbûre bağlarında vâki‘ bir tarafdan Varsalin bağı ve iki tarafdan Bildik bağı ve bir tarafdan tarîk-i âm ile mahdûd tahmînen iki bin çubuk yerli bağımızı ragabât-ı nâs munkatı‘a oldukdan sonra mesfûr Mosiko zimmîye doksan guruş deynimiz [mukābelesinde] tarafeynden îcâb ve kabûlü hâvî bey‘-i bâtt-ı kat‘î ile deynimiz olan doksan guruşa mesfûr Mosiko zimmîye takās ol dahi minvâl-i muharrer üzere meblağ-ı merkūm doksan guruş deynimiz mukābilinde mezkûrân bağları mukāssa edip ba‘de’l-yevm mezkûrân bağlarda kat‘â alâka ve medhalimiz yokdur, mesfûr Mosiko zimmî keyfe mâ yeşâ mutasarrıf olsun dediklerinde [her]biri âharın zimmetlerini husûs-ı mezkûra müte‘allika da‘vâdan ibrâ-i âm ve kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’t-tâsi‘ min-Zilka‘deti’ş-şerîfe sene ışrîn ve mi'e ve elf. Şuhûdü’l-hâl: Veli Efendi İmâm-ı Dolayba, Davud Bey, İbrahim Beşe, Halil Beşe b. Hasan, Uzun Kosta, Todori v. Lefter.