Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 566 Hüküm no: 1106 Orijinal metin no: [106b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülağa bt. Çifti’nin, Kamer bt. Abdullahtaki emânet eşyaların çalındığı Gurbet tâifesinden olup mahrûse-i Üsküdar’da Toygar Hamza mahallesinde sâkine Gülağa bt. Çifti nâm hâtun meclis-i şer‘-i şerîfe mahalle-i mezbûrede Kamer bt. Abdullah nâm hâtunu ihzâr ve mahzarında da‘vâ ve takrîr-i kelâm edip bundan akdem iki köhne sarı kaftan ve bir siyah Bursa fotası ve iki kuşak ve bir ferâcemi mezbûreye emânet vaz‘ eylemiş idim hâlâ taleb ederim deyicek merkūmeden suâl olundukda zikr olunan esbâbları emâneten almış idim ammâ gece ile pencerem bozulup evime hırsız girip esbâbım sirkat olundu mezbûrenin emânet koduğu esbâb bile gitmiş deyu cevâb vericek mersûme Gülağa talebiyle ahâlî-i mahalle-i mezbûreden tefahhus olundukda mahalle-i merkūmeden Veli Bey b. Abdurrahman ve Mehmed b. Eynehan ve Süleyman b. Ali nâm kimesneler mahfil-i kazâya hâzırân olup bir gece mezkûre Kamer Hâtun’un evinde feryâd olundu evine vardık evinin penceresinin parmakları bozulup bir sandık pâresi yatar ammâ hırsızı görmedik deyu alâ tarîki’ş-şehâde haber verdiklerinde emânet vaz‘ olunan esbâbları kimesneye vermediğine ve bir hîle etmediğine mezkûre Kamer’e yemîn teklîf olundukda yemîn billâh ettiği kayd-ı sicil olundu. Tahrîren fî evâili Safer sene elf. Şuhûdü’l-hâl: (…) Ali Bey b. Abdullah, el-Hâc Hüseyin b. Mustafa, Mehmed b. Behrâm, Hasan b. (…)