Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 567 Hüküm no: 1107 Orijinal metin no: [107a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen kocası Dragoz’un, Selman Ağa Evkâfı’na borcuna kefil olan eşi Eryarine bt. Todori’nin, borcu ödeyecek parası olmadığı Oldur ki Mahrûse-i Üsküdar’a tâbi‘ Darıca nâm karyeden Eryarine bt. Todori nâm zimmîye mahfil-i kazâda mahrûse-i Üsküdar’da vâki‘ Selman Ağa evkāfına mütevellî olan Yusuf Çelebi b. Budak mahzarında bast-ı kelâm edip bundan akdem mahrûse-i mezbûreye tâbi‘ Kadıköy nâm karyeden zevcim Dragoz nâm zimmînin mezbûr Yusuf Çelebi’ye bin dört yüz akçe deyni olup meblağ-ı mezbûrun üzerine kefîl bi’l-mâl olmuş idim mezbûr Dragoz müflisen mürde olup meblağ-ı mezbûru ba‘de’l-mürd mezkûr Yusuf Çelebi taleb edip Muhzır Hasan nâm kimesneye havâle olunup meblağ-ı mezbûru edâya aczim vardır karye-i mezbûrede mülküm ve emlâkim yokdur kût-ı yevmiyeye kādire değilim keyfiyet-i ahvâlim ahâlî-i karye-i mezbûremizden suâl olunsun dedikde ahâlî-i karyeden Mustafa Bey b. Abdullah er-râcil ve Osman b. Mustafa ve Ahmed Reis b. Bâli ve Mehmed b. Hacı Abdullah ve Hasan b. Ali ve Ali b. Abdullah ve Mehmed b. Ali ve Receb Reis b. Ali ve cemm-i gafîr Müslümanlar meclis-i şer‘a hâzırûn olup mezkûre zimmîyenin karyeden mülkü ve emlâki yokdur kût-ı yevmiyeye kādire değildir müflisdir deyu haber verdiklerinde imlâsına hükm olundukdan sonra mezbûre zimmîyenin annesi Erine bt. Todori kızının nefsine ve hîn-i mütâlebede ihzârına kefîl oldum dediği alâ vukū‘ihî kayd-ı sicil olundu. Hurrire fi’t-târihi’l-mezbûr. Şuhûdü’l-hâl: Veli Bey b. Abdullah Kapudan, Mehmed b. Habîb, Mehmed b. Behrâm, Hüseyin b. Behrâm, Sefer b. Abdullah, Şemseddin b. Sâdık