Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 569 Hüküm no: 1111 Orijinal metin no: [107b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zaharya v. Dimitri’nin, Kosta v. Andriye’den alacaklı olduğu Oldur ki Mahmiye-i Üsküdar’da Yeni mahalle sâkinlerinden Kosta v. Andriye nâm zimmî mahalle-i mezbûreden Zaharya v. Dimitri nâm zimmî ile müşterek koyun sürüsü alıp kuzusuz satıp hâlâ hesâblaşıb mezbûr Zaharya beş bin beş yüz akçe süt bahâsından bin yedi yüz kırk iki akçe yirmi kuzu bahâsından iki yüz akçe keçi bahâsından cem‘an yedi bin dört yüz kırk iki akçe kabz edip Kosta dahi üç bin akçe süt bahâsından bin sekiz yüz altmış akçe otuz bir dâne koyun bahâsından cem‘an dört bin sekiz yüz altmış akçe kabz edip bu takdîrce ber mûceb-i iştirâk mezbûr Kosta’nın mezbûr Zaharya’da bin iki yüz doksan bir akçe hakkı zuhûr edip mezbûr Zaharya’nın dahi mezbûr Kosta’dan bin altı yüz akçe kendünün müstakil koyunu masrafından? kabz eylemeğin çıkıp bin iki yüz doksan biri tutup bâkī mezbûr Zaharya’nın mezbûr Kosta’da üç yüz seksen dokuz akçesi zâhir olup vech-i meşrûh üzre hesâb olunup mâ vaka‘a bi’t-taleb sicil olundu. Şuhûdü’l-hâl: Ramazan Yeniçeri, Musli Çelebi, Kurd Çelebi, Şemseddin b. Sâdık, Hasan b. Sâdık Şemseddin havâle-kerd Derkenar: Mezbûreden mâ’adâ dört yüz kırk iki akçe dahi mezbur Zaharya kendi malından harc eylediğine iştirâk oldukları husûsa mezbûr Kosta mukır olup bu hesâbca iştirâk (…?) ile nısfı ki iki yüz yirmi akçe eder üç yüz seksen dokuz olunup cem‘an merkūm Kosta’dan alıver on akçeye sâbit ve zâhir olup mâ vaka‘a bi’t-taleb sicil olundu. Derkenar: Ba‘dehû dört yüz kırk iki akçesi dahi mezbûr Kosta ikrârıyla harc eyledi deyu isbât olup cem‘an sekiz yüz otuz akçeye hükm olundu târih-i mezbûr şuhûd-ı sâbık Derkenar: Ramazan Beşe otuz koyun akçesini altmış hesâbınca bana teslîm olundu küsûr isterim dediği kayd olundu Yevmü’l-Cum‘a fi’l-yevmi’s-sânî aşer min şehri Saferi’l-muzaffer sene 1000