Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 571 Hüküm no: 1117 Orijinal metin no: [108a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi ile İstemad v. Yorgi’nin, Abdullah Ağa Vakfı’ndan mukâtaaya aldıkları köylerin vergilerin toplanmasında vakfa olan borçları ve İstemad’ın iltizâmdan çıkartılması Üsküdar kazâsına tâbi‘ İstavros nâm karyeden hâmilü’l-kitâb Meremmetci Yani v. Yorgi nâm zimmî mahfil-i kazâda karye-i mezbûreden İstemad v. Yorgi nâm zimmî mahzarında takrîr-i kelâm edip Abdullah Ağa evkāfından Lanka ve Kuzguncuk ve İstavros ve Fıstıklı nâm karyelerin cizye ve ispençe ve sâir rüsûm-ı şer‘iyye ve örfiyyesi ve cürm ü cinâyet ve bâd-ı hevâ ve resm-i zemîni ve bi’l-cümle tapu-yı zemînden ve Mehmed Paşa Bahçesi ve Hâdım Korusu nâm bundan mâ‘adâsını dokuz yüz doksan târihinden üç yıla dek yüz doksan iki bin akçe mezbûr İstemad ile müşterek iltizâm edip zabt etmek üzre ikimiz beynimizde vakf-ı mezbûrun beş bin akçeye zâyi‘âtı vâki‘ olup vakfa ödemek lâzım gelip mezbûr İstemad ödemekden ibâ edip ferâgat eylemeğin ben zikr olunan beş bin akçe zâyi‘âtı vakıf cânibine ödemeye mültezim ve müte‘ahhid oldum dediğinde mezbûr İstemad’a suâl olundukda beş bin akçe zâyi‘âtı ödemezim ferâgat ederim demeğin vakf-ı mezbûr mütevellîsi olan fahrü’l-akrân Mustafa Çelebi b. İsmail dahi mezbûr Yani’nin beş bin akçe ziyâde zâyi‘âtı bahâsını ödemek şartıyla zikr olunan karyelerin istisnâ olunandan mâ‘adâsını üslûb-ı sâbık üzre mezbûr Yani’ye verip merkūm İstemad’ı iltizâmdan ihrâc eylediğinde işbu vesîka sebt olundu. Şuhûdü’l-hâl: Sefer b. Abdullah, Hüsam Halîfe b. el-imâm, Mehmed b. Behrâm, el-Hâc Ali b. Mustafa el-müezzin, Hüseyin b. Hasan, Ali Çelebi b. Mahmud el-kâtib, el-Hâc Hüseyin b. Mustafa ve gayruhüm Yevmü’s-sebt fi’l-yevmi’s-sâlis aşer min şehri Safer