Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 245 Hüküm no: 493 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mülâyim bt. Abdullah’ın geri dönüşü olmayan talak ile kocası İbrahim b. Hamza’dan boşandığı Vech-i tahrîr-i sicil oldur ki Beşiktaşı’nda sâkine Mülâyim bt. Abdullah nâm hatun hâliyâ zevci olan İbrahim b. Hamza ile hüsn-i zindegânîleri olmayıp mâbeynlerinde münâza‘a-i şedîde vâki‘ oldukdan sonra mahfil-i şer‘-i şerîfe hâzırân olduklarında mezbûre Mülâyim bi’l-müvâcehe bi’t-tav‘ ve’r-rızâ ikrâr-ı şer‘î ve i‘tirâf-ı mer‘î kılıp işbu hâmilü hâze’l-kitâb zevcim İbrahim zimmetinde olan bin akçe mehr-i mü’eccelimden ve iddet-i nafakamdan ve sâir hukukumdan cüz’î ve küllî her ne ise bi’l-külliyye hüsn-i ihtiyârım ile ferâğat etdim ba‘de’l-yevm eğer bir vechile da‘vâ ve nizâ‘ edersem inde’l-hükkâm mesmû‘ ve makbûl olmaya bu şart üzere bana talâk versin dedikde mukırre-i mezbûrenin ikrâr ve kavl-i meşrûhunu mezbûr İbrahim kabûl ve tasdîk etdikden sonra mezbûre Mülâyim’e bâyin talâk verip fasl-ı husûmet ve kat‘-ı nizâ‘ olduğu mezbûr İbrahim talebiyle kayd-ı sicil olundu. Tahrîren fî evâili Zilka‘de li-sene seb‘a ve sittîn ve tis‘a mi’e. Şuhûd: Mevlânâ Alâeddin Halîfe b. Abdünnebi, Mevlânâ Mehmed b. Veli el-imâm, Cafer Halîfe b. Pir Mehmed el-mu‘allim, Hamza b. Ahmed el-müezzin, Cafer b. Hüseyin, Ramazan b. Mahmud, Mustafa b. Abdullah, Ferruh b. Abdullah ve gayruhüm.