Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 256 Hüküm no: 519 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Emin ile kardeşlerinin anneleri Şahî’den kendilerine intikal eden evlerini Ferahnaz bt. Abdullah’a sattıkları Vech-i tahrîr-i hurûf oldur ki Beşiktaş mahallâtından Yenice nâm mahalleden Emine bt. Emin kendi nefsinin asîli ve karındaşı Hüseyin ve kız karındaşı Mümine nâm sagīrlere kıbel-i şer‘den [vasî] olan Emine bt. Emir meclis-i şer‘a hâzıra olup Ferahnaz bt. Abdullah nâm hatun mahzarında ikrâr ve i‘tirâf edip bundan akdem fevt olan anam Şâhî muhallefâtından bize intikāl eden Yenice nâm mahall[e]de olan tahtânî evimizi bir tarafı Şerefe Hatun evine ve bir tarafı Pervâne b. Abdulah mülkü ve bir tarafı Lala Beşe b. Abdullah evine ve bir tarafı tarîk-i âm ile mahdûd olan evimizi işbu hâmiletü hâze’l-kitâb Ferahnaz’a beş yüz elli nakd-i râyic fi’l-vakt fıddî akçeye bey‘ edip semen-i mezbûru bî-kusûr alıp kabûl [ve] kabz edip teslîm-i mebî‘ etdim dedikde mukırre-i vasînin ikrâr ve akvâl-i meşrûhunu mezbûre müşterî vicâhen kabûl ve tasdîk edip mâ vaka‘a bi’t-taleb kayd olundu. Tahrîren fi’l-yevmi’l-ışrîn min-Recebi’l-mürecceb sene 968. Şuhûd: Mahmud Bey sipâhî, Ali b. Selim, Ali b. Abdullah, Hüseyin b. Abdullah, Ferruh b. Abdullah, Mehmed b. Mustafa el-muhzır ve gayruhüm mine’l-hâzırîn.