Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 260 Hüküm no: 531 Orijinal metin no: [68b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Pereşkova’nın Şeyh Ferhad Vakfı’ndan aldığı borç karşılığında iki yer evini rehin verip bir yıllığına kiraladığı Yevmü’l-ehad, 10 Zilka‘de sene 966 Oldur ki Akındıburnu nâm karyeden Kuruçeşme nâm mevzi‘den Yani v. Pereşkova nâm zimmî meclis-i şer‘-i şerîfe hâzır oldukda ikrâr kılıp karye-i mezkûrede bir tarafı Vasil ve bir tarafı Simo tarlası ve bir tarafı tarîk-i âm ile ve taraf-ı [râbi‘i] dağ ile mahdûd olan iki yer evimi ve bir fırını ve âbhânesiyle ve pınarıyla hudûdu ve hukuku ile Şeyh Ferhad Vakfı’na mütevellî olan oğlu Ahmed Çelebi yedinden mâl-ı vakıfdan beş bin akçe alıp mezkûr mülkümü meblağ-ı merkumdan ötürü mülk-i mezbûrumu bi tarîki’l-istiğlâl bey‘ edip teslîm-i mebî‘, kabz-ı semen etdiğimden sonra [bir] yıl va‘ade ile beş yüz akçe icâreye alıp kabûl etdim deyü icâre-i mezkûrenin derkine karye-i mezkûreden Mihal [v.] Nikola ve Arhandon bt. Manol nâm zimmîleri kefîl verdim kefâlet-i mezkûreyi mezbûrlar dahi kabûl edicek mukarrun lehü’l-mezkûrun [mukırr-ı mezkûrun] ikrârını mütevellî-i mezbûrun vekîl-i şer‘îsi ve câbîsi olan Rüstem b. Abdullah bi’l-vekâle tasdîk edip gıbbe’t-taleb bu vesîka ber-sebîl-i temessük ketb olunup yedine def‘ olundu ki vakt-i hâcetde ihticâc edine. Fi’t-târihi’l-mezbûr. Şuhûd: Mehmed b. Veli el-imâm ve Mehmed el-müezzin, Hayreddin b. Toğan el-kayyım.