Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 294 Hüküm no: 615 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstinoz v. Kiryakos’un Beşiktaş’taki bir ev ile bahçeciğini kızı Eline’ye hibe ettiği Vech-i tahrîr-i sicil oldur ki Karye-i Beşiktaşı’nda sâkin olan Petro v. Dimitri zevci Eline’nin vekîli olup vekâleti bi-hasebi’ş-şer‘ sâbit ve zâhir oldukdan sonra vekâleten meclis-i şer‘-i şerîfe gelip ve kayınatası İstinoz v. Kiryakos[‘u] bile ihzâr edip ve mahzarında şöyle takrîr-i kelâm eyledi ki işbu müvekkilem Eline Aryaki?kızıdır bana nikâh olunduğu vakit karye-i Beşiktaşı’nda bir tarafı Korucu Mahmud ile bir tarafı benim mülküm ile bir tarafı tarîk-i hâs ile bir tarafı Zenoz mülkü ile mahdûd tahtânî bir ev ile bahçeciğini eşcâr-ı müsmiresi ve tevâbi‘ ve levâhıkı ile işbu müvekkilem kızı Eline’ye ba‘de’t-tahliye hibe eyledi ol dahi kabûl ve kabz eyledi ol zamandan beri üç yıldan ziyâdedir şimdi cümlesin? taleb ederiz deyicek mezbûr İstinoz b. Kiryako’ya suâl olucak inkâr ile cevâb verip gıbbe’l-inkâr müdde‘î-i mezbûrun da‘vâsına mutâbık ve muvâfık beyyine taleb olucak geri Nasârâ tâifesinden Kosta b. Vasil ve Manol b. Yani ve Mihal b. Manol ve Mitro b. Mihal müdde‘î-i mezbûrun da‘vâsına mutâbık edâ-i şehâdet-i şer‘iyye edicek ba‘de’t-tezkiyye şehâdetleri bi’l-müvâcehe hayyiz-i kabûlde vâki‘ olup mâ-hüve’l-vâkı‘ bi’t-taleb kayd-ı sicil olundu. Tahrîren fî evâsıtı Cumâdelûlâ li-sene 968. Şuhûdü’l-hâl: Korkud müezzin b. Aydın ve Nebî b. Hızır el-kâtib ve Kubad b. Abdullah el-câbî ve Mehmed b. Mustafa el-muhzır ve Ferruh b. Abdullah el-emîn ve Dole [b.] İskender karye-i Kalyoz, Kosta b. Yani ve gayruhüm mine’l-hâzırîn.