Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 297 Hüküm no: 621 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lefter b. Yorgi’nin Bünyad b. Şedrak’a altı buçuk filori borcu olduğu Vech-i tahrîr-i hurûf oldur ki Lefter b. Yorgi ile Bünyad b. Şedrak meclis-i şer‘-i şerîfe hâzır olup mezbûr Bünyad merkūm Lefter’den altı buçuk filori taleb ederim hâliyâ karzdan benim bunun zimmetinde altı buçuk filorim vardır deyicek mezbûr Lefter’e suâl oluncak inkâr ile cevâb verip gıbbe’l-inkâr müdde‘î-i mezbûrun da‘vâsına mutâbık beyyine taleb oluncak udûl-i müslimînden ve sikāt-ı muvahhidînden Mevlânâ Hasan b. Abdullah sâkin fî mahalle-i Kâtib Muslihiddin ve Mahmud b. Abdullah sâkin fî mahalle-i Davudpaşa bi’l-müvâcehe şöyle şehâdet-i şer‘iyye eylediler ki mezbûr Lefter merkūm Bünyad’a altı buçuk filori karzdan deyni ikrâr eyledi biz bu husûsa şâhidleriz şehâdet dahi ederiz deyicek şehâdetleri ba‘de’t-ta‘dîli’ş-şer‘î ve’t-tezkiyye hayyiz-i kabûlde vâki‘ olup ve kefereden dahi hâzırîn Toros dahi böyle şehâdet edip mâ-hüve’l-vâkı‘ bi’t-taleb kayd-ı sicil olundu. Şuhûdu’l-hâl: Ferruh b. Abdullah ve Mehmed b. Mustafa el-muhzır, Yusuf b. Abdullah ve Kutlu Bey b. Pîrî ve gayruhüm.