Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 299 Hüküm no: 627 Orijinal metin no: [83a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un ölen kardeşi Mehmed’den kendisine intikal eden ev hissesini kız kardeşi Nefise’ye sattığı Fâtma Hatun [ile] Nefise meclis-i şer‘-i şerîfe gelip şöyle ikrâr ve i‘tirâf eyledi ki fevt [olan] karındaşım Mehmed’den bana irs-i şer‘î ile intikāl eden bir tarafı Keyvan Kethüdâ ile bir tarafı Bâli Bey ile bir tarafı tarîk-i âm ile bir tarafı deryâ ile mahdûd olan menzilin bir hissesi benim hisse-i şer‘îmdir zikr olan menzilin karındaşımdan irs-i şer‘î ile intikāl eden hisse-i şer‘îmi işbu hâmiletü’l-kitâb hemşîrem Nefîse Hatun bt. Hamza’ya dokuz bin üç yüz râyicü’l-vakt fıddî-i Osmanî akçeye bey‘ eyledim hâliyâ semen-i mezbûru bî-kusûr aldım kabz eyledim teslîm-i mebî‘ ve kabz-ı semen ve îcâb ve kabûl dahi olmuşdur deyicek mukırre-i mezbûreyi mezbûrenin ikrârın mukarrun-lehâ’l-merkūme Nefîse Hatun tarafından tasdîka vekîl olup vekâleti bi-hasebi’ş-şer‘ sâbit ve zâhir olan Mevlânâ Mustafa Çelebi b. Mevlânâ Yahya Çelebi Efendi vekâleten meclis-i şer‘de bi’l-müvâcehe tasdîk edip mâ-hüve’l-vâkı‘ bi’t-taleb kayd olundu cerâ zâlik ve hurrire Fî evâili Cemâziyelâhir li-sene 968. Şuhûdu’l-hâl: Kurd b. Aydın, Mehmed b. Veli el-imâm, Nebî b. Mustafa, Nebî b. Hızır, Hâcı Hamza b. Abdullah, Hasan Çelebi b. Hamza Bey, Kurd b. Aydın el-müezzin ve İbrahim b. Sâdık el-müezzin ve İbrahim b. Hoca el-müezzin, Ahmed b. Hamza, Hasan Halîfe b. Ali ve Hasan Halîfe b. Mahmud ve gayruhüm.