Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 201 Hüküm no: 245 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köle olduğu zannıyla yakalanan Gürcü asıllı Siyavuş b. Abdullah’ın köleliğini inkar ettiği Bi’l-fi‘il kasaba-i Beşiktaş’da subaşı olan Ali Bey b. Kemal kasaba-i merkūme yasakçılarından Veli Beşe b. İbrahim yediyle yine kasaba-i merkūmede abd-i âbık olmak zu‘muyla ahz olunan işbu orta boylu kara kaşlı kara gözlü Gürciyyü’l-asl Siyavuş b. Abdullah mahzarında takrîr-i kelâm edüp mezbûr Siyavuş târih-i kitâb günü beyne’s-salâteynde işbu hâzır bi’l-meclis mezbûr Veli Beşe ber-vech-i muharrer ahz etmişdir suâl olunup takrîri tahrîr olunmasını taleb ederim dedikde mezbûr Siyavuş istintâk olundukda cevâbında ben Vilâyet-i Rumeli’nden İlbasan kazâsına tâbi‘ Nikidenli nâm karyeden Ali nâm kimesnenin sulbî oğluyum ve ismim Mehmed ismi ile müsemmâ ve maskat-ı re’sîm karye-i mezbûrede olup aslâ bana rık târî olmamışdır dedikden sonra yine iâde-i kelâm edüp ben sâbıkā yeniçeriler kethüdâsı iken bundan akdem maktûlen müteveffâ olan Mustafa Ağa’nın abd-i memlûkü iken sâbıkā mülkünden beni i‘tâk ve tahrîr edüp ve müteveffâ-yı mezbûrun kethüdâsı gāib ani’l-meclis Sinan Ağa vech-i meşrûh üzere yedime hat ve hatemi ile mahtûm temessük ibrâz etmeğin gıbbe’l-inkâr mezbûr Siyavuş’dan takrîrine mutâbık beyyine taleb olundukda ikāme-i beyyineye adem-i kudreti olmağın vâki‘ hâl alâ-vukū‘ihî bi’t-taleb ketb olundu. Fi’l-yevmi’s-sâlis ve’l-ışrîn min-Şevvâli’l-mükerrem [li]-sene isneyn ve sittîn ve elf. Şühûdü’l-hâl: Hüseyin Efendi b. Mehmed, Hızır Efendi b. Nasûh el-müderris, Mustafa Beşe b. Mehmed, Cafer Beşe b. Mehmed, Mehmed b. Ramazan ve gayruhüm.