Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 217 Hüküm no: 270 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Ahmed Ağa’nın Beşiktaş’taki evini Saliha Hatun bt. Murad’a sattığı Husûs-ı âti’l-beyânın mahallinde tahrîri iltimâs olunmağın küttâb-ı mahkemeden Hızır Efendi irsâl olunup ol dahi mahrûse-i Galata muzâfâtından kasaba-i Beşiktaş’da Cafer Paşa Sarayı’nda sâkin fahrü’l-akrân İbrahim Bey b. Ahmed Ağa’nın menziline varup hilâl-i sutûrda mastûru’l-esâmî olan Müslimîn huzûrunda akd-i meclis-i şerîf eyledikde mezbûr İbrahim Bey meclis-i merkūmda zahrü’l-muhadderât Saliha Hatun bt. Murad mahzarında bi’t-tav‘ ve’r-rızâ ikrâr-ı tâm ve takrîr-i kelâm edüp akd-i âtî sudûruna değin silk-i mülk yedimde ve taht-ı tasarrufumda olup kasaba-i merkūmede vâki‘ bir tarafı bazen müşteriye-i mezbûre Saliha Hatun ve bir tarafı bazen Ahmed Efendi mülkleri ve bir tarafı bazen Ferhad Ağa Vakfı ve bazen Mehmed Çelebi b. Bayram Ağa mülkü ve bir tarafı Şehlâ Mahmud Efendi mülkü ve bir tarafı tarîk-i âm ile mahdûd iki bâb tahtânî ve beş bâb fevkānî büyût-i müte‘addideyi ve mahzeni ve bi’r-i mâ’î ve kenîfi ve cüneyneyi ve tahtında üç bâb dükkânı mezbûre Saliha Hatun’a tâmmü’l-vezn ve kâmilü’l-ayâr bin kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm bin guruşun beş yüz kıt‘a guruşunu yedinden alıp kabz eyledim meblağ-ı bâkī beş yüz guruşunu târih-i kitâbdan yüz seksen [gün] tamâmına değin te’cîl eyledim ba‘de’l-yevm menzil-i mezbûr merkūme Saliha Hatun’un mülk-i müşterâsı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîki’ş-şer‘î saray-ı mezbûr sâkinlerinden fahrü’l-akrân Cafer Bey b. Şaban Ağa meblağ-ı mezbûr beş yüz guruşu tarafeynden emr ve kabûlü hâviye kefâlet-i sahîha-i şer‘iyye ile kefîl olmağın vâki‘ hâli mevlânâ-yı mersûm mahallinde tahrîr ba‘dehû gelip meclis-i şer‘de alâ-vukū‘ihî inhâ ve takrîr eylemeğin mâ-vaka‘a bi’t-taleb ketb olundu. Fi’l-yevmi’s-sâmin min-Zilka‘deti’ş-şerîfe li-sene isneteyn ve sittîn ve elf. Şühûdü’l-hâl: Mefharü’l-küttâb Ahmed Efendi b. Hasan, Hasan Efendi [b.] Şaban, Mehmed Çelebi b. Mustafa, Mehmed b. Şaban, Ahmed Çelebi b. Mustafa, Mehmed Çelebi b. Mehmed, el-Hâc Ahmed b. Hızır, Ramazan Reis [b.] Receb, Ahmed Reis b. Veli, Receb b. Sefer, İbrahim b. Abdullah, Mehmed b. Ramazan, Mustafa Efendi b. Hasan, Kenan b. Abdullah, Hacı Çelebi b. Bâli, Yusuf b. Abdullah, Musa Efendi b. Abdullah ve gayruhüm.